> Nascit in Sardigna su casu brebexinu “Saludi e Bonesa: unu casu chi cumbatit a su Colesterolu | ilMinuto

Nascit in Sardigna su casu brebexinu “Saludi e Bonesa: unu casu chi cumbatit a su Colesterolu

(IlMinuto) – Casteddu, 1 de su mesi de totussantus – Arribat in Sardigna su casu brebexinu chi cumbatit a su Colesterolu. Su nòmini suu est “Saludi e Bonesa”, s’at agatai in is butegas a cumentzai de su 5 de su mesi de totussantus chi benit e at a essi bendiu in su mercau ingresu puru. A ddu fai est Argiolas Casus. S’alimentu de sa saludi at a podi essi impitau in is dietas chi tenint pagu colesterolu, poita, “Saludi e Bonesa” portat Omega 3 (“acido linoleico coniugato”). “S’influéntzia recìproca intre Cla, Omega 3 e is àtzidu grassus chi s’agatant in su lati – si ligit in su giassu de Argiolas Casus – atressu de su ‘riequilibrio metabolico’ no fait aumentai a su colesterolu, antzis, ddu podit fai abasciai”. Su casu nou, no solu, est chentza de aditivus aciuntus: Omega 3 e Cla funt otentus in manera naturali de allevamentus sceberaus de brebeis nudriadas cun pasturas de calidadi e chi tenint saludi bella. Is únicus ingredientis de su Casu Brebexinu funt duncas: lati, sabi, “fermenti lattici” e callu. Unu casu, chi chi at a andai a arricai a su mercau de is produtzionis sardas, nàsciu de is diversus istúdius e circas de su Dipartimentu de Isciéntzias ”Biomediche” de s’Universidadi de Casteddu, de su Dipartimentu de Agronomia e Gestioni de s’”Agroecosistema” de s’Universidadi de Pisa, de s’Ispidali Brotzu de Casteddu e de sa Asl 8 de Castedddu. Istúdius e circas chi ant tentu torraboxi in su British Journal of Nutrition puru, de su mesi de austu de su 2012. Provau po 21 diris asuba de 40 malàdius cun problemas de subrapesu e de colesterolu artu, is arrasutaus otentus ant amostau ca, chentza chi su malàdiu essat modificau sa dieta sua, su cambiu de unu calisisiat casu cun “Saludi e Bonesa” fait amenguai a su colesterolu de su 7% amellorendi puru s’azioni “metabolica”.

© RIPRODUZIONE RISERVATA

0 Arrespustas a “Nascit in Sardigna su casu brebexinu “Saludi e Bonesa: unu casu chi cumbatit a su Colesterolu”


Is cummentus funt serraus.