> Imparamentu de su sardu in iscola. Una possibilidadi didàtica e culturali manna | ilMinuto

Imparamentu de su sardu in iscola. Una possibilidadi didàtica e culturali manna

(IlMinuto) – Casteddu, 25 de su mesi de gennàrgiu – S’annu iscolàsticu chi benit is famílias de sa Sardigna ant a podi isceberai si fai imparai su sardu a is fillus insoru. A ddu fai isciri est s’ofítziu de imprenta de s’Assessori de sa Pública Istrutzioni, Benis Culturalis, Informatzioni, Ispetàculu e Isport Sergio Milia. Una novidadi bella meda e unu primu passu po torrai a donai dignidadi a sa língua de is Sardus. Giai in is cidas passadas s’assessori Milia iat sollicitau a su responsàbili ministeriali de s’iscola in Sardigna, Enrico Tocco, a sensibilitzai a is dirigentis de is autonomias iscolàsticas po s’insertamentu de s’iscéberu po s’imparamentu de sa língua sarda in is módulus de pre-iscritzioni po s’annu iscolàsticu 2013-2014. Un’arrespusta positiva, sa chi est lómpia de sa Diretzioni Iscolàstica, chi at imbiau una tzirculari a totus is capus de istitutu innoia si pedit s’apricu de sa normativa istatali in matéria. “Dógnia iscola, segundu su gradu de istrutzioni chi est lamada a gestiri, a su personali chi tenit, a is istruturas, a is resossas finatziàrias e professionalis – iscririt Tocco a is dirigentis iscolàsticus – fait su Pranu de s’Oferta Didàtica suu. Su curruculu obligatóriu podit essi duncas arricau e amanniau de àteras propostas didàticas”. “In custu cuadru – sighit Tocco – est cumbeniosu amentai ca is indicus natzionalis po su curriculu de s’iscola de sa crialla e de su primu ciclu de istrutzioni previdint, po su caminu chi pertocat a s’italianu, de pigai in cunsidériu, intre is àteras cosas, s’arrichesa e sa variedadi de is línguas de minoria chi tenint importu mannu in su patrimóniu linguìsticu de Sardigna”. Gràtzias a sa lei 482/99, chi amparat a sa língua sarda e a is variedadis ‘alloglotte’ chi s’agatant in Sardigna, is babus e is mamas ant a depi fai isciri a s’istitutzioni iscolàstica interessada de bolli po is próprius fillus s’imparamentu de sa língua de minoria. Satisfau s’assessori Sergio Milia chi afirmat “no eus bintu sa gherra perou una batalla dda eus concuistada, seus arrennescius a assegurai, de parti de su Ministeru, puru si a tradu, s’apricu de sa lei e imoi si podeus impegnai po torrai a artziai sa conca e po cumentzai unu caminu nou”. “S’obietivu – sighit – est su de lompi in cincu annus a sa majoria de is famílias chi isceberant su sardu (o is àteras línguas chi s’agatant in Sardigna) e un’annestru de prus de una língua chi no iscaresciat s’italianu e is àteras línguas istràngias”

© RIPRODUZIONE RISERVATA

0 Arrespustas a “Imparamentu de su sardu in iscola. Una possibilidadi didàtica e culturali manna”


Is cummentus funt serraus.
Biàgios

Social

Facebook     Twitter     Feed RSS  

In primu pianu

 

mes'e gennàrgiu: 2013
L M M G C S D
« pas   fià »
 123456
78910111213
14151617181920
21222324252627
28293031  
Formas
S'Urtima nova