> In Casteddu cun Scida un’atopu po chistionai de indipendentismu sardu | ilMinuto

In Casteddu cun Scida un’atopu po chistionai de indipendentismu sardu

(IlMinuto) – Casteddu, 25 de su mesi de martzu – “Is fundamentus istóricus e políticus de s’indipendentismu sardu”. Est su títulu de su cunvegnu-dibàtidu aprontau po mérculis 27 de su mesi de martzu a cumentzai de is 17.30 in is aposentus de tzineteatru Nanni Loy acanta de sa domu de s’istudianti de arruga Trentinu in Casteddu. S’atopu, aprontau de su Cumitau de is Istudiantis Universitàrius “Scida 2013”, bolit essi unu mamentu acraradori e de cunfrontu po chistionai de is políticas indipendentistas e at a circai de fai luxi “asuba de s’istória política de sa Sardigna e asuba de is cusseguéntzias chi custa tenit oi cun s’iscopu de istallai is arrexonis istóricas de s’indipendentismu e s’abisóngiu políticu suu in sa Sardigna de oi”. S’avenimentu at essi obertu de unu caminu istóricu lestru “po cumprendi – si ligit in sa pàgini facebook dedicada a su cunvegnu – is arrexonis de sa tzerachia e de s’indipendentismu, e po cumprendi puru su cómpitu de is giòvanus in sa lota de liberamentu natzionali”. Asuta de is lampionis ddoi ant essi prusatotu is acuntéssias de Giovanni Maria Angioy e de su PSd’Az de sa nàscida fintzas a lompi a sa batalla política intre autonomismu e indipendentismu. Diversus is interventus prevìdius, de s’istóricu Salvatore Cubeddu a su Cordinadori Natzionali de Sardigna Natzione Indipendentzia Bustianu Cumpostu, de Cristiano Sabino, Boxi de a Manca pro s’Indipendentzia a Luca Piroddi, imbassadori de ProgReS Progetu Repùblica de Sardigna, a Doddore Meloni, Presidenti Natzionali de Movimentu Europeu Rinaschida Sadra. Su cunvegnu at essi ghiau de Andrea Pili de su Cumitau Scida 2013.

© RIPRODUZIONE RISERVATA

0 Arrespustas a “In Casteddu cun Scida un’atopu po chistionai de indipendentismu sardu”


Is cummentus funt serraus.