> Is blocus de is programas informàticus ferrint a is tzitadinus. Sa denúntzia de SdR | ilMinuto

Is blocus de is programas informàticus ferrint a is tzitadinus. Sa denúntzia de SdR

(IlMinuto) – Casteddu, 25 de su mesi de martzu – “Is funzionamentus malus nàscius po mori de su blocu de is programas informàticus ferrint sèmpiri de prus a is tzitadinus disamparaus e apuridus”. Est cantu afirmat Maria Grazia Caligaris, presidenti de s’assótziu Sotzialismu Diritus e Reformas a faci de is diversus avisus de is clientis de sa Circoscritzioni 1 de Abbanoa, blocaus, de diris medas, a fai in is ufítzius de arruga Cornalias is diversas pràtigas, intre is calis is isciogadroxus, is “subentri”, is cuntrollus e sa condierra. Sa Circoscritzioni 1 de Abbanoa tenint cumpeténtzia po sa gestioni de s’àcua in totu sa provìntzia de Casteddu, “No si podit duncas pentzai – pretzisat sa presidenti de SdR – ca su programa informàticu ‘Logos’ potzat abarrai frimu po dexi diri e prus”. A cantu narant is incarrigaus de su númeru birdi de sa sotziedadi, su serbítziu iat a depi torrai a pigai a funtzionai oi, ma a faci de is istrobus donaus de sa ténnica, “est netzessàriu – concluit Caligaris – chi, cun s’impitu fitianu de is sitemas informàticus, is entis e sa pública aministratzioni, in s’ipótesi de guastus, si achipagint de isceras bàlidas chi potzant istrantziri cusseguéntzias malas a is clientis obrigaus a aguantai abetus, pellongus e bistentus.

Fotografia de Andres Rueda. Pigada de Flickr

© RIPRODUZIONE RISERVATA

0 Arrespustas a “Is blocus de is programas informàticus ferrint a is tzitadinus. Sa denúntzia de SdR”


Is cummentus funt serraus.