> Oi in Assèmini su dibàtidu “Sardegna, bella da morire” | ilMinuto

Oi in Assèmini su dibàtidu “Sardegna, bella da morire”

(IlMinuto) – Casteddu, 15 de su mesi de martzu – Si lamat Beranu Asseminesu sa retza de tzitadinus indipendentistas impignaus in sa campagna de s’anàlisi e de su dibàtidu ingíriu a is temas sotzialis, culturalis i económicus chi tenint comenti protagonista su territóriu. A pustis de s’afirmadura manna tenta cun is primus duus avenimentus, s’amentu fatu a is patriotas de Palabanda e su de s’Atòbiu Indipendentista, Beranu Asseminesu proponit un’àteru atopu, chi tenit po títulu “Sardegna, bella da morire – Ambiente: rischi e opportunità per Assemini” e chi s’at a isboddiai própriu in Assèmini custu merì a is 17.30 in sa saba cunvegnus de s’Hotel Grillo, in arruga de su Cramu 132. S’avenimentu – si ligit in d-una nota de imprenta – “promitit de atirai s’atentzioni de sa genti de sa bidda,e de is Cumitaus interessaus a is chistionis ambientalis”. Su tema tenit s’arrexini sua in is datus bessius asuba de s’arriscu mannu de “leucemias in su tretu ovest de Casteddu (Sarroccu,Pauli de Nuras, Assèmini)”. Intre is chi ant a fueddai in su merì de sceda: Claudia Zuncheddu, Consillera regionali indipendentista de SardignaLibera e su Professori Vincenzo Migaleddu, Presidenti de s’ISDE (Médicus po s’ambienti), s’unu e s’àteru de tempus meda impegnaus in sa denúntzia de is arriscus chi currit s’ambienti. Ant a fueddai puru su giornalista Vittorio Sanna e s’espertu in políticas comunitàrias Giovanni Casula.

© RIPRODUZIONE RISERVATA

0 Arrespustas a “Oi in Assèmini su dibàtidu “Sardegna, bella da morire””


Is cummentus funt serraus.