> Galsi o no Galsi sa Sardigna no podit abarrai trancuilla | ilMinuto

Galsi o no Galsi sa Sardigna no podit abarrai trancuilla

(IlMinuto) – Casteddu, 30 de su mesi de maju – At a tocai a abetai tambeni un’annu po isciri ita detzididura at essi pigada asuba de su cumprimentu de su gasdotu Galsi. De s’assembrea milanesa de sa sotziedadi Galsi (fata de sa Sfirs, s’Edison, s’Enel produtzioni, su grupu Hara e s’algerina Sonatrach) ndi bessit su determinu, pigau a s’acabu de s’atopu, de perlongai a su 31 de su mesi de maju de su 2014 is isceras apitzus de su finatziamentu de s’òpera, s’ùnica boxi contras, sa de Regioni Sardigna, chi definit s’òpera bene isestada po sa terra sarda e chi bit s’iscadèntzia noa estremada. Ma su frenu bòfiu de sa Sonatrach e is arreselus asuba de su metanodotu, nascint po mori de s’abascimentu mannu de is prétzius patiu su mercau de su gas, e chi duncas no iat a donai is fiantzas chi abisongiant po recumpensai su dinai chi s’iat a depi bogai po su Galsi atressu de un’investimentu mannu. Ma Regioni no mollat sa bidea de metanitzai s’ìsula. Si su Galsi no at a benni fatu ddoi ant essi àteras solutzionis, inter custas unu gasdotu intre sa Sardigna e sa Toscana, cun d-unu collegamentu intre Piombino e Terranòa, ma est tambeni una bidea de is aministradoris regionalis. Est difatis, totu de biri, poita sa Regioni at a depi allegai cun su Guvernu, puru po circai is finantziamentus netzessàrius po fai s’eventuali progetu. In pagus fueddus Galsi o no Galsi sa Sardigna sighit a bivi cun sa pantàsima de si biri su logu impestau e istrupiau de unu metanodotu. Mo mori de chini? A bosàterus s’arraspusta.

© RIPRODUZIONE RISERVATA

0 Arrespustas a “Galsi o no Galsi sa Sardigna no podit abarrai trancuilla”


Is cummentus funt serraus.