> Bessiri de sa crisi est possìbili. In Casteddu cunvegnu:”Antigas tennologias po un’architetura noa in tempus de ‘Decrescita” | ilMinuto

Bessiri de sa crisi est possìbili. In Casteddu cunvegnu:”Antigas tennologias po un’architetura noa in tempus de ‘Decrescita”

(IlMinuto) – Casteddu, 10 de su mesi de maju – In Casteddu s’at a fueddai de “bioarchitettura” cun su cunvegnu: “Antigas tennologias po un’architetura noa in tempus de ‘Decrescita”, aprontau po sàbudu 11 de su mesi de maju de SardignaLibera. S’avenimentu, chi at a cumentzai de is 16.00 in is aposentus de s’Hotel Mediterràneu de Casteddu, at a biri is relatas de su Profesori Antonello Sanna, s’istudiosu de “architeturas de is logus” e de su fràbricai in “làdiri” chi s’at a firmai asuba de is traditzionis de allogai e isvilupai, e de s’architetu Fabrizio Carola, chi cun sa massima “fai bivi beni a s’òmini”, atressu de s’impitu de s’antigu cumpassu nubiano, donat vida a fàbricus apitzus de sa subrafaci de su terrenu chentza de istuvonai po is fundamentus, cun costus bàscius meda e chi totus si podint acollai. Un’òmini, – si ligit in d-una nota de imprenta – “chi fait connosci sa genialidadi sua ponendidda a su serbìtziu de sa genti, po chi chinisisiat potzat imparai a si fabricai sa pròpriu domu chentza de ispaciai su territòriu, antzis, avalorendi sa balanza intre s’òmini, sa natura, s’ambienti e sa cultura”. Intre is chi ant a chistionai ddoi at essi Giulietto Chiesa puru, chi at a fueddai de sa crisi de is economias mundialis fintzas a sa ripresa de is economias territorialis e traditzionalis po “opugnai s’isciaccu mannu”, s’iscentziau Vincenzo Migaleddu, chi at a allegai de una “riconversione” possìbili, partendi de is modelllus de isvilupu “faddius” a is “ecocompatibili” e “ecosostenibili” in Sardigna e in su mundu, e a pustis de tantu s’assessori Ras Claudia Zuncheddu, chi at a chistionai de sa mudàntzia bòfia a sa marolla de is territòrius e is reatzionis e is propostas de sa genti sarda.  In suu coru de is traballus is abisòngius, sa saludi, sa cultura, s’ambienti e s’architetura, poita – si marcat in d-una nota de imprenta – “est possìbili bessiri de sa crisi torrendi benistai, balanza a sa vida de is òminis e de su praneta”.

© RIPRODUZIONE RISERVATA

0 Arrespustas a “Bessiri de sa crisi est possìbili. In Casteddu cunvegnu:”Antigas tennologias po un’architetura noa in tempus de ‘Decrescita””


Is cummentus funt serraus.