> 2013 mes’e làmpadas 03 | ilMinuto

Archíviu de sa diri 3/06/2013

Progetu geotermicu “Cullieri”: Cumitau Àbabenicomunu Pianàlza-Montiferru aderit a sa batalla

(IlMinuto) – Casteddu, 3 de su mesi de làmpadas – Su Cumitau Àbabenicomunu de sa Pianàlza e de su Montiferru donat s’adesioni sua a sa batalla contra a su progetu geotermicu “Cullieri”, bullau a cuncòrdiu de su Consillu Comunali de Sèneghe e de su de Magomadas. Su progetu pertocat s’isfrutamentu de s’energia geotermica in su territòriu de su Montiferru de parti de sa sotziedadi Exergia Toscana. Su cumitau apretat in prus “tzitadinus, assòtzius e aministradoris” a pigai parti totus impari a una gherra po unu territòriu chi, in s’acasu fessat pertusau, nd’at a bessiri arruinau po sèmpiri. Amentaus ca is comunus interessaus de su progetu funt: Cullieri, Frussìo, Magomadas, Sagama, Santu Lussurzu, Iscanu, Sèneghe, Sennariolo, Tinnura, Tresnuraghes, a custus s’aciungint is comunus puru de ‘Osa, Sune e Modolo, chi impitant partzialmenti s’àcua chi de sa mantessi mitza, chi, si fessat fatu s’impiantu, iat essi afrogongiada meda. Sighi a ligi ‘Progetu geotermicu “Cullieri”: Cumitau Àbabenicomunu Pianàlza-Montiferru aderit a sa batalla’

In Sardigna is turris de is costeras diventant Hotel de pompa. aMpI:”Frimaus sa distrossa”

(IlMinuto) – Casteddu, 3 de su mesi de làmpadas – In Sardigna is turris de is costeras funt istruturas fortaléssias assentadas ororu de su mari, chi in barigau teniant funtzioni de càstiu, defensioni e atacu, cun s’iscopu de preveniri e iscontriai possìbilis invasionis de su mari. In su tempus benidori, in sìsula, custas istruturas ant podi diventai hotel de pompa, restorantis e ofellerias. Su territòriu sardu tenit difatis 15 turris chi sa Regioni bolit “avalorai”. S’idea de avaloramentu proposta de sa Ras no praxit perou a is indipendentistas de a Manca, chi in d-una nota de imprenta marcant: “sa natzioni nostra tenit unu patrimòniu istòricu, archeologicu, monumentali e artìsticu mannu mannu. Pecau chi siat de propriedadi de s’istadu italianu e no de su pòpolu sardu, e pecau chi s’istadu italianu apat determinau de ddu lassai in su discòidu e in s’arruina prus totali!”. Po is indipendentistas de aMpI sa Ras tenit sa crupa manna de no bolli arresolvi custa situatzioni. A issa s’aciungit sa responsabilidadi de no bolli programai un’interventu de recùperu sériu po avalorai su patrimòniu monumentali de s’ìsula, pighendi aici manorberia e professionalidadis de su logu etotu. Sighi a ligi ‘In Sardigna is turris de is costeras diventant Hotel de pompa. aMpI:”Frimaus sa distrossa”’

Sa pantàsima de un’àtera tzerachia militari: Su Muos. In Ras interrogatzioni Zuncheddu

(IlMinuto) – Casteddu, 3 de su mesi de làmpads – Si lamat Muos, i est sa pantàsima de un’àtera tzerachia militari in Sardigna. Funt difatis “sèmpiri berrinosas is novas, chi lompit siat de is giornalis sardus siat addia de su Tirrenu, chi a cantu narant at essi iminenti s’imponidura de custu progetu in Sardigna puru, e asserru asserru in d-un’artìculu de giornali bessiu in sa ‘La Nuova Sardegna’ de su 12 de su mesi de maju de su 2013 benit marcau s’arrolu tzentrali atribuiu a su “tzentru de comunicatzioni cun is sutamarinus nuclearis de s”Us Navy di Tavolara’ de sa Marina Militari de is Istadus Unius po su progetu”. Est cantu marcat su consilleri de SardignaLibera Claudia Zuncheddu, chi impari a is consilleris Cocco, Sechi e Cugusi at presentau in Consillu Regionali un’interrogatzioni cun pregunta de arraspusta iscrita, pedendi beridadi asuba de is possibilidadis de fàbricu de su progetu Muos in s’ìsula. De ita seus chistionendi? Su Muos, sigla impitada po inditai su “Mobile User Objective System”, no est àteru ca unu impiantu de comunicatzioni mannu meda de s’esércitu Usa, chi iat a arregalai tambeni una borta, impestadura e maladias a su territòriu sardu. Sighi a ligi ‘Sa pantàsima de un’àtera tzerachia militari: Su Muos. In Ras interrogatzioni Zuncheddu’

Unu cursu de amaistramentu po imparai iscièntzias in is iscolas elementaris

(IlMinuto) – Casteddu, 3 de su mesi de làmpadas – S’at a isboddiai de su 4 a su 6 de su mesi de cabudanni chi benit su cursu po maistus de iscola elementari de sa Sardigna chi tenit comenti tìtulu “Imparai iscièntzias in s’iscola de oi e de cras”. Sa proposta est aprontada de Sardigna Circas, cun s’agiudu de s’Assessorau regionali de sa Programatzioni. “Su cursu – si ligit in d-una nota – [...] tenit s’obietivu de donai istrumentus nous po s’imparamentu de is iscièntzias e s’at a fai [...] in Casteddu e in Pauli de Nuras”. Sighi a ligi ‘Unu cursu de amaistramentu po imparai iscièntzias in is iscolas elementaris’

In su Lazaretu Sant’Elia sa mostra de artista Zanele Muholi

(IlMinuto) – Casteddu, 3 de su mesi de làmpadas – Tenit comenti coru sa creatzioni de una mapa, chi siat “un’istòria visuali de is perdumascus nieddus in Sud Africa agoa de s’apartheid”. Est unu traballu de s’artista africana Zanele Muholi, ativista de sa comunidadi Lgbti, in mostra in Casteddu, in is aposentus de su Lazaretu Sant’Elia, cun is fiberas de fotografias “Faces & Phases” e “Being”. Sa produtzioni de s’artista tenit s’iscopu – si ligit in d-una nota de imprenta – de “torrai a vengai una realidadi arreusada de s’istòria ufiziali e [...] denuntziai is mortis fatas de is crìminis de ódiu, sa pràtiga de su violentamentu curregidori comenti cura a sa caghineria e su problema de sa preventzioni a s’Aids”.

Sighi a ligi ‘In su Lazaretu Sant’Elia sa mostra de artista Zanele Muholi’