> Destrossas fatiscas. Fiu: “sa Sardigna guvernada in d-una cunditzioni de apretu bòfiu” « ilMinuto – notizie Mediterranee – edizione Sardegna

Destrossas fatiscas. Fiu: “sa Sardigna guvernada in d-una cunditzioni de apretu bòfiu”

(IlMinuto) – Casteddu, 19 de su mesi de totussantus – Cleopatra messat vitimas, Cleopatra destruit un’ìsula intrea, agangada ai de su bentu e de s’àcua, ma prusatotu de su bentu e de s’àcua agiudaus de unu cumportamentu polìticu-aministrativu, chi de sèmpiri no at tentu arrespetu po su territòriu. Is mortis de òminis e bestias chi si registrant in is ùrtimas oras benint acriminadas a una natura bìdria, ma no funt is ùnicas pèrduas grais de s’ìsula. “Sa Sardigna est guvernada in d-una cunditzioni de apretu bòfiu!” – cumentant in d-una nota de imprenta is indipendentistas de su Fronte Unidu. Mannus meda is dannus matèrialis chi ferrint a is Sardus. In su tretu de Casteddu puru, innoia Cleopatra est stétia prus feritzosa, “su tempus malu” at fatu dannu a sa lìnia elètrica chi alimentat su potabilizatori de Simbirizzi. S’impiantu serbit is comunus de Casteddu, Cuartu Sant’Alèni, Ceraxus, Cuartucciu, Mara Calagonis, Sèttimu, Crabonaxa e Brucei. In abetu chi s’Enel torrit a fai partiri s’alimentatzioni elètrica sa produtzioni at essi prus pagu a petus de is abisòngius de is logus interessaus. Si is traballus de arrangiadura iant a depi durai a longu no funt de s’esclùdiri funtzionamentus malus in sa furnidura de s’utenza e sa sbuidadura de is reservas in is serbatoius. Ma de chini est sa cupra de sa destrossa chi at fertu s’ìsula de tramuntana a meridioni? Po su Fui est “de chini at firmau cuncessionis edilitzias apitzus de is errius e de chini tambeni oi ghiat campagnas eletoralis fadendi sa prumissa de incumentai totu, no scinedi su chi acontessit candu si segant is echilìbrius de sa natura“. A faci de un’àteru degògliu “Su Fronte Indipendentista Unidu pedit chi bengat lamada una diri de lutu natzionali sardu e ca sa diri infatu totu su Consillu Regioni lassit s’incàrrigu po ausèntzia ladina a fai su chi si depit fai est a nai a amparai is interessus e sa mantessi vida de su Pòpolu Sardu”

© RIPRODUZIONE RISERVATA

0 Arrespustas a “Destrossas fatiscas. Fiu: “sa Sardigna guvernada in d-una cunditzioni de apretu bòfiu””


Is cummentus funt serraus.