> Su Comitau S’arrieddu po Narabuja aprontat: “Passiaus apitzus de sa Terra – Gherra contra a s’acaparradura de is terras” « ilMinuto – notizie Mediterranee – edizione Sardegna

Su Comitau S’arrieddu po Narabuja aprontat: “Passiaus apitzus de sa Terra – Gherra contra a s’acaparradura de is terras”

(IlMinuto) – Casteddu, 21 de su mesi de totussantus – Est prevìdiu po sàbudu 23 de su mesi de totussantus de su 2013 s’atopu cun “Passiaus apitzus de sa Terra – Gherra contra a s’acaparradura de is terras”. S’avenimentu, aprontau de su Comitau “S’arrieddu po Narabuja” cun s’agiudu de su “Tzentru Internatzionali Gruxeri” e cun s’amparu de “Terra Gramsci” at a cumentzai a is 18.00. S’atòbiu, chi s’at a sboddiai in su Tzentru “Polifunzionale” de pratza Segni in Narabuja, previdit sa proietzioni de unus cantu de documentàrius chi lompint de su Festival de is Terras. In s’avenimentu at essi presentau su stùdiu “Green Land Grabbing – ‘Furtovoltaico’ e acaparradura de is terras in Itàlia – Sardigna” puru. “Sa cumassa e s’acaparradura de is terras no acontessit scéti in is stadus chi incumentzant a s’afirmai – acrarat SIrvia Doneddu – custus duus fenòmenus capitant oi in Europa puru. Custu raportu – pretzisat – fait connosci un’arrèula cuada: su 3% scéti de is meris de is terras funt lòmpius a cuntrollai sa metadi de is terras saliosas. S’intramentu a sa terra – sighit Doneddu – est una de is primus cunditzionis po portai a cumprimentu una soberania alimentari in Europa e iat a depi essi donau a is chi dda arant”. Agoa de is diversas proietzionis in programa at a serrai s’atopu unu documentàriu de su Tzentru Internatzionali Gruxeri chi tenit comenti de tìtulu “Passiaus apitzus de sa Terra”, unu spricullitu asuba de su fenòmenu de s’acaparradura de is terras in Sardigna chi denuntziat is afàrius chi si cuant apabas de s’idea chi no tenit fundamentu de sa green economy. S”impatto’ ambientali negativu e sa fura de is terras bonas funt puru is cusseguéntzias de una fura fata a is dannus de is massajus e is allevadoris sardus. Fura fata cun is serras fotovoltaicas de Narabuja puru. “In Sardigna beteus d’80% e prus de is prodotus agroalimentaris chi spaciaus. De su chi papaus ndi fadeus demancu de su 20%”, afirmat Pedru Porcedda de su Comitau aprontadori, pretzisendi ca “is atòbius benint aprontaus po interessai a is comunidadis asuba de s’impotu “de sa soberania alimentari e duncas asuba de is perìgulus chi ferrint e no agiudant is aradroxus nostrus amparendiddus de sa destrossa insoru o de s’acrassadura insoru”

© RIPRODUZIONE RISERVATA

0 Arrespustas a “Su Comitau S’arrieddu po Narabuja aprontat: “Passiaus apitzus de sa Terra – Gherra contra a s’acaparradura de is terras””


Is cummentus funt serraus.