> In Istintinu s’Odissea in crai moderna « ilMinuto – notizie Mediterranee – edizione Sardegna

In Istintinu s’Odissea in crai moderna

(IlMinuto) – Casteddu 7 de su mesi de martzu – Est stètiu presentau mèrculis passau in Tàtari, in is aposentus de sa Camara de su Cumèrciu de sa Sardigna de Tramuntana, a sa presèntzia de s’assessori a su Turismu de su Comunu de Istintinu Anghelu Schiaffino, de sa consillera comunali cun dèlega a sa Cultura Frantzisca Demontis, de su regista Malachi Bogdanov, de su produtori Simon M. Woods, de su produtori assotziau e presidenti de Cineclub Tàtari Carlu Dessì, su progetu cinematogràficu “De Itaca cun amori – s’Odissea”. Su film chi est un’adatadura in crai contemporanea de s’Odissea de Omeru, at a essi girau in grecu antigu e latinu e at essi sutatitolau atressu de “crowd sourcing” globali in is lìguas de dògnia continenti. S’òpera at essi cumpartzia a gratis in totu is iscolas e is universidadis de su Pianeta e, in su mantessi tempus, at essi cumpartzia in is tzìnemas puru, in is televisionis, online e in cd. Su cumentzu de is ripresas de sa pellìcula dirigia de Malachi Bogdanov s’at a isboddiai intre de su mesi de cabudanni e de su mesi de ledàminis de ocannu e at a trisinai Istintinu e s’arenàrgiu de sa Pelosa po 25 diris e pagu prus. “Pigaus in cunsidèriu de trisinai is traballadoris de su logu a diversus livellus” - at afirmau su regista Bogdanov. Su film chi at a durai un’ora e mesu e pagu prus est, po sa consillera comunali cun dèlega a sa Cultura Frantzisca Demontis una bella possibilidadi po “fai connosci de prus galu Istintinu a totu su mundu”. Fueddendi de sa biddixedda, s’assessori a su Turismu Anghelu Schiaffino at amentau ca “Istintinu est stètia giài àteras bortas protagonista in film, ndi funt esèmpiu ‘Is sennoris de s’istadi’ de Filipu Canu, e in is annus noranta ‘Una noti chi proit’ de Giannifrancu Bullo”.

© RIPRODUZIONE RISERVATA

0 Arrespustas a “In Istintinu s’Odissea in crai moderna”


Is cummentus funt serraus.