> Alig’Art 2014_Futuro Anteriore: call for artists « ilMinuto – notizie Mediterranee – edizione Sardegna

Alig’Art 2014_Futuro Anteriore: call for artists

(IlMinuto) – Casteddu, 26 de su mesi martzu – Arribat ocannu a sa de cuàturu editzioni Alig’Art, su festival aprontau de s’assòtziu Sustainable Happiness, chi ponit impari arti e sustenibilidadi ambientali, ecònomica e sotziali. In programa in Casteddu in su mesi de cabudanni, Alig’Art castiat a su “Futuro Anteriore”. Su tema scerau po su 2014 est un’obietivu puru – comenti si ligit in d-una nota de imprenta – “a su cali totus depeus lompi bincendi unu mamentu chi est de crisi no scéti econòmica ma prusatotu e puru de valoris”. Po Sustainable Happiness, difatis, su “Futuro Anteriore” est prus acanta de cantu no si potzat pentzai. S’assòtziu promovit duncas is marranias suas. Sa primu est dedicada a designer, gràficus artistas e interessaus in generali, lamaus a presentai òperas fatas cun matèrialis de “riciclo”. At a essi donada atentzioni manna a is òperas chi ant a rapresentai – pretzisant is aprontadoris – “ita siat su benidori”. Is òperas ant a depi essi nascias oi, in su presenti, de ogetus e matèrialis chi siant giai cunsideraus de arrefudu, e chi, torraus a manixai, dongant unu messagiu nou. Po pigai parti a sa cosa est netzessàriu imbiai intru su 15 de su mesi de làmpadas sa dimanda de participatzioni, e tres fotografias de s’òpera a s’indiritzu: aligartfestivalgmail.com.

© RIPRODUZIONE RISERVATA

0 Arrespustas a “Alig’Art 2014_Futuro Anteriore: call for artists”


Is cummentus funt serraus.