> Rennou unidadi aministrativa de Abbanoa is dùbius de “Sinistra Sarda” | ilMinuto

Rennou unidadi aministrativa de Abbanoa is dùbius de “Sinistra Sarda”

(IlMinuto) – Casteddu, 8 de su mesi de arbili – “S’Assessorau regionali de is Traballus Pùblicus, a cumentzai de su Diretori Generali no tenit fortzis sa cumpetèntzia po aprontai s’avisu pùblicu de iscera cun comissioni afatanti po su Manager nou? Est pròpriu netzessàriu ispendi 40milla eurus pighendiddus cun nota de apretu de su ‘fondo’ de reserva de su bilantzu regionali?”. Est cantu si pedint Lisàndru Corona e Giuannicu Deriu de Sinistra Sarda agoa de ai iscipiu de sa Delìbera de sa Giunta Regionali n. 10/29 de su 28 de su mesi de martzu passau, innoia si ligit ca po s’iscera de s’Aministradori ùnicu de Abbanoa sa Regioni at determinau de donai 40milla eurus a un’Azienda italiana cualificada in s’acabidadura de su personali. Corona e Deriu, mancai s’aficu torrau a cunfirmai marcant ca in sa proa de annoadura e “rilancio” de Abbanoa “ddoi funt puntus pagu crarus, si no puru chi si contraixint”. Is dùbius espressaus de is duus segretàrius pertocant s’intregu de s’iscera a una sotziedadi privada continentali: “no est craru – afirmant in d-una nota de imprenta – si custa sotziedadi puru at essi ogetu de iscera o no”. Sinistra Sarda torrat a lamai duncas s’atentzioni de s’assessori cumpetenti e de su Presidenti asuba de is efetus perigulosus de sa Delìbera Regionali de su 28 de su mesi de austu de su 2013 “Provedimentus apretosus po sa sighidura de su rifornimentu de su serbìtziu pùblicu de acuedotu, benadroxu e cobadura”, e sighit pedendi: “ita ndi pentzant su Presidenti e s’assessori de su fatu chi custa Delìbera previdat sa possibilidadi de donai a su mercau privau su benidori de Abbanoa una bia chi ispaciat su tempus de sa cuncessioni tenta de issa e apustis de su lompimentu de su status de ‘sòtziu de majoria’ de parti de sa Regioni Sardigna? Fortzis no s’iaus a depi apensamentai cun apretu, comenti tzentru-manca sardu de custa promissa crara de privatizatzioni?”. A faci de custus arragus ladinus Corona e Deriu concluint su comunicau de imprenta amostendi is dùbius insoru a petus de sistemas chi “ponint comenti solutzioni ùnica s’intregu a assistus foranus chi no assegurant a sa sola s’èsitu de is problemas de is ‘profonde complessità’”

© RIPRODUZIONE RISERVATA

0 Arrespustas a “Rennou unidadi aministrativa de Abbanoa is dùbius de “Sinistra Sarda””


Is cummentus funt serraus.