> Saboris de Sardigna: XV editzioni cuncursu dedicau a melis tìpicus sardus | ilMinuto

Saboris de Sardigna: XV editzioni cuncursu dedicau a melis tìpicus sardus

(IlMinuto) – Casteddu, 23 e su mesi làmpadas – S’at a isboddiai de su 23 a su 24 de su mesi de austu de su 2014 sa XV editzioni de su cuncursu po assignai is prèmius de calidadi po is melis tìpicus de Sardigna. Sa premiatzioni at essi fata aintru de sa Sagra de su Meli de Montevecchio, logu innoia s’at a tenni s’avenimentu. S’iscopu - si ligit in d-una nota de imprenta – “est su de agiudai sa produtzioni de melis de calidadi, avalorai is diversus tipus de meli e de ndi promovi su consumu cabosu”. Su cuncursu est aprontau de s’Agentzia Laore Sardigna cun s’agiudu de sa Pro-Loco e de su comunu de Guspini, s’assòtziu tzitadi de su meli e s’Albo natzionali tastadoris meli. Po pigai parti a su cuncursu is abieris ant a depi intregai: – s’ischeda de paticipatzioni, po dògnia campionadura; - una campionadura po dògnia tipu botànicu fata de 5 (cincu) confetzionis de 250 gr cadaunu, in vasus “cilindrici” de imbirdi biancu, totugantu anònimus; - una campionadura po dògnia tipu fata de una confetzioni de 250 gr. cadauna, in vasus “cilindrici” de imbirdi biancu, cun pinciadura cun s’iscopu de fai un’aparada publicitaria de is aziendas chi faint meli e chi pigant parti a su cuncursu”. Is campioni beranilis e atongialis ant a depi essi intregaus intru de s’11 de su mesi de argiolas de su 2014, mentras po is melis eucaliptus s’iscadèntzia est po s’8 de su mesi de austu.

Fotografia de mbeo. Pigada de Flickr

© RIPRODUZIONE RISERVATA

0 Arrespustas a “Saboris de Sardigna: XV editzioni cuncursu dedicau a melis tìpicus sardus”


Is cummentus funt serraus.