> In Tàtari su Fronte Indipendentista Unidu po un’avenimentu-dibàtidu asuba de s’informatzioni | ilMinuto

In Tàtari su Fronte Indipendentista Unidu po un’avenimentu-dibàtidu asuba de s’informatzioni

(IlMinuto) – Casteddu, 14 de su mesi de argiolas – Unu dibàtidu asuba de s’informatzioni chi si ponit preguntas, su aprontau po mèrculis 16 de su mesi de argiolas in sa saba de is “Messaggerie Sarde”, a is 18.00, de su Fronte Indipendentista Unidu tataresu. S’avenimentu tenit comenti tìtulu “Quale informazione? Prospettive di occupazione e indipendenza nei media”. “In Sardigna e po su prus in su tataresu, – pretzisant is indipendentistas de su FIU – s’informatzioni est passendi unu mamentu de crisi manna: redatzionis chi serrant, agrupamentu de is “testate” in Casteddu, sa primu tzitadi de sa Sardigna, amparu mancanti de is traballadoris de su cumpartu e galu pagu atentzioni de parti de sa polìtica a sa pèrdida sighia de postus de traballu e a sa libertadi de imprenta, a s’ausèntzia de interessu a petus de s’impitu de sa lìngua sarda”. S’iscopu de s’atopu est su de donai vida a unu dibàtidu obertu po segai sa mudesa generali asuba de su tema. Unu dibàtidu chi no depit trisinai isceti totus is chi faint su mestieri, ma puru is chi intendint s’apretu – pretzisant is aprontadoris – “de arrexonai asuba de su ruolu de s’informatzioni in sa chistioni natzionali sarda e asuba de sa crisi ecònomica grai meda  e de progetu chi custu cumpartu est passendi”. Relatoris de “Quale informazione? Prospettive di occupazione e indipendenza nei media” ant essi is giornalistas Celestino Tabasso, Marco Sanna, Luca Foddai, Maria Barca, Michele Spanu. At a ghiai su dibàtidu Ninni Tedesco, giornalista e militanti de su FIU.

© RIPRODUZIONE RISERVATA

0 Arrespustas a “In Tàtari su Fronte Indipendentista Unidu po un’avenimentu-dibàtidu asuba de s’informatzioni”


Is cummentus funt serraus.