> Lara: birras bellas meda chi cherent bufadas « ilMinuto – notizie Mediterranee – edizione Sardegna

Lara: birras bellas meda chi cherent bufadas

* Dae sa terra a sa butìllia * – 22 ghennàrgiu 2020 – Sa birra Lara naschet in Tertenia dae un’idea de Giuanne Piroddi e Frantzisca Lara. Fiat su 2009 cando Giuanne e Frantzisca ant fatu de s’amore pro sa birra su traballu issoro. Sunt 11 annos, duncas, chi su mastru birràiu e sa mastra birràia produent birras, cun una retzeta imbentada dae issos etotu.

Sas birras Lara bogant a campu nuscos e sabores chi donant a chie ddas tastat sensatziones de gosu e de allegria.

Sunt birras cruas sena èssere coladas e pro ddas prodùere impreant s’abba lìmpia de sa mitza de Santu Perdu, maltu e trigu de primore.

Giuanne e Frantzisca produent issos etotu su trigu Cappelli chi impitant pro sa produtzione de sa birra bianca “Del Senatore”, ispirada a s’istile belga. In s’azienda si produent puru sos lùpulos chi benint impitados pro fàghere sa birra Rubja e pro sa birra Tzar.

In su 2011, su Birrifìtziu Lara est diventadu Birrifìtziu Agrìcolu.

Dae su brand Lara, chi pigat su nùmene dae su sambenadu de Frantzisca, sunt nàschidos oto tipos de birra, distìnghidas in clàssicas e ispetziales.

Sas clàssicas sunt: sa Rubja, una birra ruja ispirada a s’istile inglesu, nuscosa e  marigosa pro su lùpulu meda; sa Tzar, una brunda de istile inglesu cun tessìngiu lèbiu de sabores e bilantziados cun su lùpulu; sa W16, una brunda de trigu a colore de madreperla, fragulosa e ispirada a s’istile bavaresu; in fines, sa birra de su “Senatore”, bianca e fata cun trigu Cappelli sena de maltu.Sas birras ispetziales sunt sas bator sorres famadas, totus acumonadas de un’ingrediente: su maltu de trigu. S’idea est nàschida pro propònnere a su mercadu bator birras ispetziales ispiradas a sa figura de bator feminas. Duncas, su mastru birràiu Giuanne e sa mastra birràia Frantzisca si sunt ispirados a sas bator sorres de sa famìlia Lara. Frantzisca etotu est sa de bator.

Ònni sorre tenet caraterìsticas suas e personalidade diferente comente sas birras chi ddas rapresentant: Affumiada est una birra morita fata de maltu de òrgiu e de trigu afumiadu; Sennora est una ruja firma, de gradatzione prus arta e su sabore suo ammentat su de sa frùtora; Piculina est una birra a colore de pinnadellu, fàtzile de acrobare cun antipastos de mare e de terra; Moretta est una morita de trigu turradu, bona a l’acumpangiare cun petza e durches.

A sas birras mentovadas s’agiunghet s’ùrtima creatzione de su birrifìtziu, sa Donbat, una birra gluten free lichitosa meda, chi podent bufare fintzas sas persones intollerantes a su glùtine.

Sas birras Lara sunt istimadas meda dae sos chi chircant unu sabore sentzillu e nuscos bene bilantziados. Pro custa resone paritzos chef las impreant in coghina comente ingredientes ispetziales de sas licantzas issoro.

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

© RIPRODUZIONE RISERVATA

0 Arrespustas a “Lara: birras bellas meda chi cherent bufadas”


  • Nisciunu cummentu

Lassa un'arrespusta