Barley: su birrifìtziu cun bevidas ispantosas

Unu biàgiu a totu birra in su mundu de Nicola Perra e Isidoro Mascia.
27 Fiàrgiu 2020
barley birras

* Dae sa terra a sa butìllia * – Unu nùmene famadu, su de su birrifìtziu Barley de Maracalagonis, una realidade produtiva de importu mannu chi at otentu unos cantos de reconnoschimentos.

Sa fàbrica de sa birra, chi s'agatat in carrera “Cristoforo Colombo”, at bidu sa lughe mudende una passione manna pro su mundu de sa birra in un'impresa màstrina. Gosi, sos duos sòtzios, Nicola Perra e Isidoro Mascia, un'ingegneri e unu ragionieri cummertzialista, ant unidu sas fortzas issoro faghende divenire realidade unu bisu mannu.

Sos babbos de Barley aiant una punna ladina: fàghere connòschere birras de caràtere, bevidas chi ant una personalidade forte meda, a sos ristorantes italianos e istràngios.

Posca de duos annos de istùdiu, in su 2006, su chi fiat feti su bisu de abèrrere unu birrifìtziu est mudadu in una pensada cuncreta cun sa produtzione de tres birras: sa Friska, una birra de 5 grados de alcol ispirada a sas “bière blanche”,  sa “Sella del Diavolo” una bèvida de 6,5 grados de alcol, chi est un'interpretatzione interessante de sas “bière de garde”, e sa “Toccadibò”, bèvida elegante meda, una “golden strong ale” de pagu prus o mancu de 8,5 grados de alcol.

barley birras

A pustis de carchi mese est nàschida sa BB10, un'“imperial stout” de 10 grados de alcol, cun annanta de saba fata cun àghina Cannonau. In Itàlia sa BB10 est istada sa primu birra produida impreende ingredientes leados dae su mundu de su binu.

In su 2007, dae s'adòbiu cun un'abiaresu, sos meres de Barley ant àpidu s'idea de produire una birra cun mele biològicu de arantzu, sa Zagara, una birra a colore de pinnadellu chi at pagu prus o mancu de 5 grados de alcol e praghet meda a sa gente.

Est imbetzes de su 2009 un'àtera birra a colore de pinnadellu, sa Macca Meda, una birra beverina de 8 grados de alcol.  S'annu in fatu, sunt intradas a fàghere parte de sa famìlia Barley: sa birra Tuvi Tuvi, una “Blonde Ale” beverina e frisca, e sa birra Bbevò, una “Barley Wine” cun annanta de saba fata un àghina Nascu.

Su 2010 est istadu s'annu de sa BB9, una birra fata cun saba de Malvasia e chi at 9 grados de alcol. Ant sighidu: sa Duenna, una birra che s'ispirat a s'istòricu istile belga “Saison”,  e sa BB7, una birra in istile "Italian Grape Ale" fata cun mùstiu friscu de diversas ratzas de àghina bianca nuscosa.

Totus sas birras Barley non sunt pastorizadas e nimancu coladas e torrant a buddire in sas ampuddas.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu