(IlMinuto) – Casteddu, 14 de su mesi de totusantus – S’at a isbodiai in Nùgoro su 17 de su mesi de totusantus a cumentzai de is 18.00 in su Círculu Su Ritrovu, s’atóbiu “Sardigna 2020. Unu tempus benidori de militarizatzioni, cuntrollu e iscontróriu”. A faci de un’ísula chi torrat a tenni una parti de import mannu in is progetus de sa Nato e de s’Istadu: presonis, radar, casermas e càstiu urbanu. A pabas de custa aprontadura de cuntrollu sotziali, is pregonis de su documentu “Nato 2020 Urban Operation” chi disignant is pranus nous de trebea e iscontróriu de is rebellias de su tempus benidori innoia su campu de gherra ant essi is tzitadis de su mundu otzidentali e s’anemigu nou at essi totu aintru de is lacanas istatalis, trubas “informalis”, unias de su disisperu e de sa precariedadi. Sighi a ligi ‘In Nùgoro si chistionat de militarizatzioni, cuntrollu sotziali e iscontróriu’
Archíviu de s'argumentu 'presonis'
Pàgina 2 de 25
(IlMinuto) – Casteddu, 5 de su mesi de totussantus – “Cun s’obertura de is Istitutus Penitentziàrius nous, sa Sardigna at a biri aumentai galu de prus su númeru de is tzitadinus privaus de sa líbertadi. Ant a aumentai de seguru aici is discumbénius e is apinnicus po totus”. Est cantu afirmat Maria Grazia Caligaris, presidenti de s’assótziu Sotzialismu Diritus e Reformas, candu annotat ca “s’ísula, castigada meda po sa cunditzioni de disimpreu e discumbéniu sotziali, no minescit de patiri un’impeoramentu de su pesu de sa tzerachia penitentziària puru,po mori de s’Istadu. Una tzerachia custa chi s’aciungit a cussa militari giai meda grai”. “Is presoneris in Sardigna, – pretzisat Caligaris – in pagu prus de un’annu, ant a lompi [...] a 4mila preséntzias”. Un’afirmadura chi si podit avreguai si castiaus a sa situatzioni de is presonis sardus, aundi podeus biri ca in su presoni de Tèmpiu is 29 postus de s’istrutura funt diventaus 150. In su penitentziàriu de Uda ddoi ant essi asumancu 550 postus, sa galera de Nùgoro, cun su padiglioni nou restaurau de pagu, est passada de 252 a 349 postus, intre duus mesis imbecis, candu at essi intregau S’Istitutu de Bancali, ddoi at essi logu po àterus 430 personis. Sighi a ligi ‘Sardigna, s’ísula innoia sa presonia at a diventai un’elementu caraterísticu’
(IlMinuto) – Casteddu, 26 de su mesi de ledàminis – Si presentant comenti istórias de aministratzioni ordinària, innoia sa saludi e sa dignidadi de su tzitadinu privau de sa libertadi funt collocaus a s’úrtimu postu. Una de custas est s’acuntéssia chi ferrit a C.F., 74 annus postu ricoverau in su Tzentru Clinicu de su presoni de Buoncammino. Un’acontéssia chi no si podit poderai sa sua, malàdiu de Parkison e cun patologias intre is calis una “cardiopatia ischemica” po mori de tres puntoris a su “miocardio” e una timoria manna de s’inserru. Su presoneri, declarau incompatìbili a sa presonia de su Diretori Sanitàriu de su Policlinicu de Pauli su 14 de su mesi de martzu de su 2012, s’agat balu oi inserrau. A fai isciri de s’acuntéssia est sa Presidenti de s’assótziu Sotzialismu Diritus e Reformas Maria Grazia Caligaris, chi in d-una nota de imprenta iscririt: “Si fueddat de un’ómini chi tenit maladias grais” e “chi est abàtiu meda”. Un’ómini chi – sighit sa Caligaris – “no arrenescit a aguantai prus sa permanéntzia in cella”. Una cunditzioni, sa de F.C., chi apinicat a is sanitàrius, chi – “prus de una borta nd’at ordinau su ricoveru in ispidali innoia est abarrau puru chentza de iscorta”. Sighi a ligi ‘S’istória de C.F. in presoni cun maladias grais’
(IlMinuto) – Casteddu, 22 de su mesi de ledàminis – “Is 120 presoneris de su presoni de Aristanis-Massama ant a depi abetai po podi fai is collóchius létzitus e po tenni s’atúliu prenu de is coxinas. S’incrichida bófia a sa marolla de su Ministeru de sa Giustítzia in su trasferimentu no at permitiu de organitzai a su mesullus is duus serbítzius”. Est cantu denuntziat Maria Grazia Caligaris, presidenti de s’assótziu Sotzialismu Diritus Refomas, agoa de essi bennia a conoscéntzia gràtzias a calincunu familiari de is inserraus in su presoni de Massama de is arragus tentus po fai is collóchius cun is parentis. Un’istrutura, sa chi at replasau a su presoni de pratza Mannu in Aristanis, progetada po 250 presoneris e inaugurada cun totu chi is traballus no siant stétius acabaus. Sighi a ligi ‘De su presoni de pratza Mannu a su de Massama: is discumbénius’
(IlMinuto) – Casteddu, 19 de su mesi de ledàminis – “Unu tzitadinu privau de sa libertadi chi ndi fatzat dimanda podit impitai in cella unu computer ‘sterilitzau’, est a nai mudau casi a essi una màchina de iscriri, no unu tablet”. Est cantu denuntziat Maria Grazia Caligaris presidenti de s’assòtziu Sotzialismu Diritus Reformas, agoa de s’essi bia torrai s’ istrumentu informaticu arregalau a unu presoneri de is sotzius de Sdr, poita cunsiderau perigulosu. “Sa Diretzioni Generali de is Presoneris e de su Tratamentu – acrarat Caligaris – cun d-una nota at difatis acrarau ca su tablet est un’istrumentu chi tenit ‘dispositivi integrati’ in su sistema e duncas chi no si ndi podint liai”. Sighi a ligi ‘Presonis: su presoneri no tenit diritu a impitai su tablet’
(IlMinuto) – Casteddu, 18 de su mesi de ledàminis – “Sa Asl n.8 depit luegu providiri a assignai in su presoni de Buoncammino seti datoris ispecialistas. Sa lentesa in is proceduras burocraticas ferrit in modu grai a is presoneris conditzionant in manera negativa su diritu a sa saludi”. Est cantu afirmat Maria Grazia Caligaris, presidenti de s’assótziu Sotzialismi Diritus Refomas, pretzisendi ca “su presoni, agoa de s’intrada de sa Asl in sa meixina penitentziària, depit essi cunsiderau comenti unu presídiu sanitàriu cun is figuras professionalis chi abisongiant a fiàntzia de is tzitadinus privaus de sa libertadi chi imbecis oindì presentant fresas grais in su serbítziu”. In Buoncammino difatis no ddoi funt: su “pneumologo”, s’ortopédicu, su chirurgu, s’otorinu, s’oculista, su fisioterapista e su neurologu. Cali sa càusa? A oi no funt stétius rennovaus is cumbénius chi ddoi furiant primu che funt giai iscadius de diversas cidas . Sighi a ligi ‘In Buoncammino cumpromitiu su diritu a sa saludi. Caligaris Sdr: “Netzessàriu ismamai is proceduras burocraticas”’
(IlMinuto) – Casteddu, 18 de su mesi de ledàminis – “Conturbanti is dichiaras de su Síndigu Tendas de Aristanis chi bint in s’importatzioni in Sardigna de is presoneris 41bis e de sa criminalidadi oraganitzada, una resossa po s’ecunumia nostra”. Est cantu denuntziat sa Consillera indipendentista de SardignaLibera Claudia Zuncheddu in d-una nota imprenta de su 15 ledàminis passau. A sa Sardigna funt difatis destinaus prus o mancu de su 50% de is presoneris 41 Bis. Est custu un’àteru ”arregalu” chi su Guvernu Monti fait a s’ísula. “Un’àtera borta – cumentat Zuncheddu – s’Istadu italianu betit in sa terra nostra sa criminalidadi peus chi tenit, creendi in is territórius interessaus possíbilis intraduras mafiosas in s’ecunumia nostra e in sa sotziedadi nostra giai arrematada de sa crisi económica. Custus fenómenus de penetratzioni criminali in sa realidadi sarda funt stétius giai denuntziaus e avreguaus de sa mantessi Magistradura, in su Nord-Est de s’ísula, e no scéti ingunis”. S’agataus no solu ananti de unu regimi chi ndi liat sa dignidadi a su presoneri sardu in abetu de giudítziu o cundennau, chi subracarrigat su discumbéniu de is famílias sardas e de is abogaus, contra a su printzípiu de sa territorialidadi de sa pena, chi difatis po podi biri a su presoneri depint andai in sa penísula. S’agataus a faci de unu sistema chi negat su diritu de is presoneris sardus de passai sa presonia in sa terra insoru. Sighi a ligi ‘In apróliu in Sardigna 50% de is presoneris 41 bis. Zuncheddu s’ísula “àteru muntronaxu de arrefudus ispecialis e perigulosus”’
(IlMinuto) – Casteddu, 15 de su mesi de ledàminis – “Scriu de su presoni de Isili po denuntziai s’acontéssia grai innoia s’agatant is presoneris in custa istrutura po mori de is aposentus disadatus. Cun 12 cumpangius de cellas mius cundivideus un’aposentu de 48 metrus cuadrus, incluius is letus e sa mesa. Una situatzioni insoportàbili”. Funt custus is fueddus chi unu tzitadinu privau de sa libertadi scririt anoditzendi a s’assótziu Sotzialismu Diritus e Reformas sa cunditzioni in is calis funt custrintus a bivi is presoneris de su presoni de Isili. “Sigheus a andai ainnantis – sighit sa lítera – poita a turnu abarraus setzius asuba de is letus biu ca no ddoi at su logu po si movi. Lassendu stai su códomu iscassu po 13 personis. A su númeru mannu de cristianus in cella s’aciungit sa suspensioni de s’àcua a cumentzai de is 10 de su mangianu in custu modu medas no arrenescint nimancu a si fai sa dócia cun cusseguéntzias malas po sa coabitatzioni. No funt serbias a nudda is protestas chi eus fatu a is traballadoris de s’istrutura, issus puru difatis patit su discumbéniu chentza de podi agatai una solutzioni a is problemas”. Sighi a ligi ‘Presonis: presoneri de Isili “Comenti si fait a andai ainnantis aici?”’
(IlMinuto) – Casteddu, 3 de su mesi de ledàminis – Un’istrutura-mostru chi at a acasagiai mafiosus e camorristas sa chi a Massama, in provìntzia de Aristanis, at a oberri is cellas suas su 7 de su mesi de ledàminis chi benit. Sa denúntzia, fata de su parlamentari de su Pdl Mauro Pili atressu de un’interpellatzioni a su ministeru de sa Giustítzia, est stétia torrada a pigai de ProgReS – Progetu Repùblica chi atressu de su consilleri provintziali suu Sebastian Madau at presentau un’interrogatzioni a sa Giunta provintziali. Sa provìntzia de Aristanis – narat Madau – “s’agat in is úrtimus postus po ‘infrastrutture’ económicas e sotzialis (trasportus, imparu, sanidadi)”, ma su territóriu bit investimentus mannus in istruturas penitentziàrias, gràtzias a su Pranu Istraordinàriu Presonis aprovau de su Guvernu Italianu in su 2009. Sighi a ligi ‘Interrogatzioni Madau ProgRes asuba de su Presoni de Massama’
Social
