(IlMinuto) – Casteddu, 10 de su mes’e làmpadas – S’at a serrai custumerì cun d-una manifestada in pratza de su Cramu in Casteddu sa campagna po s’eja a is cuatru refendum asuba de su serbítziu ídricu, asuba de su nucleari e asuba de su “legittimo impedimento”. Sa cosa – aprontada de is Cumitaus “Acqua bene comune”, de su Cumitau Sinonucle e de is movimentus de basi – at a cumentzai a is 18.00 cun ispetàculus de istrada, giogus, ballus e música.
“A is 20.00 – si ligit in d-una nota – ant arribbai in pratza de su Cramu is corteus tucaus de pratza Santu Miali e de pratza Santu Giuanni XXIII, aundi s’at a tenni s’ispetàculu de serradura, po custu ant a sonai su grupu de Neoneli, is Ratapignata, is Alma mediterranea e Mario Massa”. Po is 4 eja s’est arringherau puru su consilleri regionali indipendentista Claudia Zuncheddu. Sighi a ligi ‘Referendum: Casteddu in pratza po nai cuatru eja’
Archíviu de s'argumentu 'nucleari'
(IlMinuto) – Casteddu, 3 de su mes’e làmpadas – “A pustis de s’arrasutau de su referendum regionali contr’a su nucleari est necessàriu afortiai su sceberu chi at biu su 97% e pagu prus de is eletoris sardus votai Eja in su referendum natzionali e conttribuendi a lompi a su quorum”. Est candu narat cun d-una su Cumitau “Vota SI per fermare il nucleare” a pagus diris de su votu referendàriu de su 12 e de su 13 de su mes’e làmpadas. “Su Cumitau – si ligit in d-una nota de imprenta – isperat chi su Presidenti de sa Giunta regionali no torrit agoa a fac’e custu referendum e sigat cun su mantessi impignu tentu po su referendum sardu”. Asuba de is cuatru refendum fueddat puru Alessandro Corona, cordinadori regionali de su Pdci. Sighi a ligi ‘Referendum: Cumitau “Vota SI per fermare il nucleare”. “Cappellacci no torrit agoa”. S’apello de Pdci’
(IlMinuto) – Casteddu, 30 de su mes’e maju – Sighit sa batalla de Sinonucle. Agoa de sa bitória de su 15 e de su 16 de su mes’e maju, s’Esecutivu de su Cumitau at decidiu de s’impegnai puru in is referendum de su 12 e de su 13 de su mes’e làmpadas. Su Cumitau – si ligit in sa delíbbera aprovada cida passada in Aristanis – “At stabbiliu de s’impegnai, cun sa mantessi frimmesa [...] chi at tentu po su referendum consultivu regionali, in sa pubblicidadi de s’EJA in su referendum contr’a su nucleari e in is duus referendum contr’a sa privatizatzioni de s’àcua. Po su referendum asuba de su “legittimo impedimento” su cumitau s’agat de acórdiu cun sa necessidadi chi totus is citadinus siant agualis ananti de sa lei”. Asuba de su mantessi tema est stetiu fattu connosci s’apellu “Quattro leggi infami”, firmau de “Sinistra Critica”, “Collettivo Marxista-Leninista” de Nùgoro, Círculu Prc de Aristanis 2 e Vincenzo Pllai (Prc). Sighi a ligi ‘Referendum: su 12 e su 13 de su mes’e làmpadas Sinonucle contr’a su nucleari e sa privatizatzioni de s’àcua. Apelli contr’a “Cuatru leis aggraviosas”’
(IlMinuto) – Casteddu, 19 de su mes’e maju – “Su pópulu sardu est stracu de fabas”. Aici su diretivu natzionali de a Manca pro s’Indipendentzia cummentat a is afirmaduras de su Ministru po is raportus cun su Parlamentu, Elio Vito, asuba de sa bitória de is EJA – cun su 97,13% – de su referendum contr’a su nucleari chi s’est tentu su 15 e su 16 de su mes’e maju – acrarat aMpI – “afirmat ca s’ésitu de su referendum consultivu est significativu scéti de s’ategiamentu de sa genti sarda e no de sa boluntadi de s’Itàlia e duncas ndi declarat s’illegalidadi. Ma no est totu. Su Ministru, sennori italianu, declarat cun ignòrantzia e barrosia ca in Sardigna no ddoi est stetia una campagna informativa giusta asuba de s’acasigiu de is centralis nuclearis e de is depósitus de aremus, poita no s’est fueddau comenti si depit de is ‘arriscus’ e de is ‘possibbilidadis’ chi custas donant a sa terra nostra, una terra de sèmpiri stuprada de s’Itàlia”. Sighi a ligi ‘Nucleari. “Cun sa bitória de su referendum cumentzat su camminu de soverania e indipendentzia”, aMpI arremaciat a is fueddus de su Ministru Vito’
(IlMinuto) – Casteddu, 17 de su mes’e maju – Sa Sardigna bullat a su nucleari. Su 15 e su 16 de su mes’e maju 880.171 sardus – su 59,49 po centu de chini tenit diritu – at participau a su referendum consultivu serrendi s’istrada a su fàbbricu de centralis nuclearis e depósitus de aremus radioativus in s’Ísula. Cun su 97,98% de is EJA contr’a su nucleari de sa Sardigna, a pagu prus de de duus mesis de s’arruina de Fukushima, si pesat unu messagiu craru a su mundu. “At essi unu messagiu mannu – cummentat su cordinadori de su Cumitau Sinonucle Bustianu Cumpostu – chi si movit de unu pópulu pitiu, chi perou tenit un’ istória manna. Su messagiu ‘For a world nuclear free’ est scritu cun su linguàgiu universali de sa música i at arribbai a totu sa genti chi bolit un’àteru tipu de raportu cun mammai terra”.
Po a Manca pro s’Indipendentzia – chi at fattu una campagna contr’a su nucleari autónoma cun diversas assembreas in totu s’Ísula – s’ésitu de su referendum est “una bitória de is fortzas indipendentistas”. “Custa est – cummentat aMpI – un’istraordinària proa de fortza de su pópulu sardu chi at fiamenti decídiu de sighiri a is fortzas sanas de sa natzioni sarda mancai sa mudesa carraxera de is partidus italianus e de is sindacaus chi, linendi scéti calencuna eccetzioni isolada, ant boicotau a sa campagna”. Custa invecis s’opinioni de Gianluigi Deiana de Sinistra Critica. Sighi a ligi ‘Referendum: 850milla sardus serrant s’istrada a su nucleari. Cumpostu: “De s’Ísula unu messagiu po su mundu”’
(IlMinuto) – Casteddu, 16 de su mes’e maju – Su referendum asuba de su nucleari est bàlidu. A is 22.00 de ariseru su 39,83% de is eletoris sardus iat participau a su votu superendu a su quorum de su 33% previdiu de sa lei regionali. Is urnas ant essi obertas oi puru po totu su mangianu in totus is comunus de sa Sardigna. Fintzas a is 15.00 at essi ancora possíbbili arrespundi a sa dimandha: ““Ses contràriu a s’installatzioni in Sardigna de centralis nuclearis e de situs po su depósitu de ferrinas radioativas avantzadas o presistentis?”. Sighi a ligi ‘Referendum nucleari: otentu su quorum. Urnas obertas fintzas a is 15.00′
(IlMinuto) – Casteddu, 12 de su mes’e maju – Su mamentu de sa beridadi s’acostat. Su 15 e su 16 de su mes’e maju – a pustis de una batalla política longa meda cumetzada in s’atóngiu de su 2009 con s’arregorta de is firmas de parti de Sni – is sardus ant essi lamaus a votai po arrespundi a sa dimandha: “Ses contràriu a s’installatzioni in Sardigna de centralis nuclearis e de situs po su depósitu de ferrinas radioativas avantzadas o presistentis?”. Domínigu at essi possíbili votai de is 8.00 a is 22. Lúnis is urnas ant essi obertas scéti su mangianu, de is 7.00 a is 15.00. Sighi a ligi ‘Referendum: su Cumitau Sinonucle serrat sa campagna cun d-una chistionada manna in Casteddu. Sardus a su votu su 15 e su 16 de su mes’e maju’
(IlMinuto) – Casteddu, 9 de su mes’e maju – A pagus diris de su referendum de su 15 e de su 16 de su mes’e maju, sighit sa campagna contr’a su nucleari po su referendum de su 15 e de su 16 de su mes’e maju, candu is sardus ant essi lamaus a arrespundi a sa dimandha: “Ses contrariu a s’installatzioni in Sardigna de centralis nuclearis e de situs po su depósitu de ferrinas radioativas avantzadas o presistentis?”. Custumerì in Tàtari (20.00, pratza d’Itàlia) s’at a tenni unu comìtziu aprontau de su cumitau Sinonucle cun sa participatzioni de Bustianu Cumpostu, Giovanni Fara e Antonio Canu. Sighi a ligi ‘Referendum: comìtziu contr’a su nucleari in Tàtari. Assembrea in Nùgoro’
(IlMinuto) – Casteddu, 6 de su mes’e maju – A pagu prus de una cida de su referendum de su 15 e de su 16 de su mes’e maju est sèmpiri prus arricu su càlendariu de is apuntamentus contr’a a su fàbbricu de centralis nuclearis e depósitus de aremus radioativus in Sardigna. “Mellus un’ou oi ca una centrali cras. Un’ou contr’a su nucleari” est su títulu de s’apuntamentu programmau po cras de su Pdci- Fds in Casteddu, Tàtari, Nùgoro, Tèmpiu e Tortuelie. “Materiali po acotzai a sa campagna referendaria contr’a su nucleari e po cumbidaia is sardus a votai EJA a su referendum de su 15-16 de su mes’e maju de su 2011 e in prus – acrarant is aprontadoris a is citadinus ant essi donaus ous friscus, comenti símbulu de genuinidadi e de “energia limpia”. Sighi a ligi ‘Referendum: apuntamentus contr’a su nucleari in S’Alighera, Tàtari, Nùgoro, Crabònia, Tèmpiu e Tortuelie’
(IlMinuto) – Casteddu, 5 mes’e maju – A pagus diris de su referendum de su 15 e de su 16 de su mes’e maju asuba de sa preséntzia de centralis nuclearis e de depósitus de aremus in Sardigna funt medas is eventus in totu su territóriu. Cras in Tàtari, a is 16.00, s’at a tenni un’atóbiu-dibbatidu in s’Àula Umanistica de sa Facoltadi de Líteras e Filosofia, apuntamentu custu, aprontau de is assótzius Su Majolu e Aziru, agoa at a sighiri, a is 20.00 un’ispetàculu de música e teatru in sa sedi de su círculu “Dopolavoro Ferroviario”. “Cumbidaus is istudiantis e totu su pópulu sardu – acrarant is aprontadoris – a un’atóbiu po s’informai asuba de is perígulus de su nucleari in Sardigna e po mandai ainnantis sa lota contr’a is centralis chi bolint ponni in sa terra nostra”. In sa mantessi diri s’at a fueddai de nucleari puru in Casteddu (15.30, Teatru Massimu), cun d-unu cunvegnu internatzionali aprontau de sa Regioni Sardigna a 25 annus de su sciaccu de Chernobyl. Sighi a ligi ‘Referendum: cunvegnus e dibbàtidus asuba de su nucleari in Tàtari e in Casteddu’
Social
