(IlMinuto) – Casteddu, 10 de su mes’e làmpadas – S’at a serrai custumerì cun d-una manifestada in pratza de su Cramu in Casteddu sa campagna po s’eja a is cuatru refendum asuba de su serbítziu ídricu, asuba de su nucleari e asuba de su “legittimo impedimento”. Sa cosa – aprontada de is Cumitaus “Acqua bene comune”, de su Cumitau Sinonucle e de is movimentus de basi – at a cumentzai a is 18.00 cun ispetàculus de istrada, giogus, ballus e música.
“A is 20.00 – si ligit in d-una nota – ant arribbai in pratza de su Cramu is corteus tucaus de pratza Santu Miali e de pratza Santu Giuanni XXIII, aundi s’at a tenni s’ispetàculu de serradura, po custu ant a sonai su grupu de Neoneli, is Ratapignata, is Alma mediterranea e Mario Massa”. Po is 4 eja s’est arringherau puru su consilleri regionali indipendentista Claudia Zuncheddu. Sighi a ligi ‘Referendum: Casteddu in pratza po nai cuatru eja’
Archíviu de s'argumentu 'referendum'
Pàgina 2 de 4
(IlMinuto) – Casteddu, 8 de su mes’e làmpadas – Cgil Sardigna e Css narat cuatru bortas eja. Po is referendum de su 12 e de su 13 de su mes’e làmpadas is duas organizatzionis sindacalis cumbidant a is sardus a andai a is urnas i a arrespundi eja a is cuatru dimandhas. “Sa ‘Confederazione Sindacale Sarda’ – acrarat su sindacau in d-unu comunicau – s’arringherat po s’eja a totus is cuatru dimandhas referendàrias, totus a difesa de sa saludi, de s’aria e de s’ambienti (1° dimandha contr’a is centralis nuclearis), in sa difesa de s’àcua comenti beni púbblicu [...] chi no depit essi privatitzau (2° dimandha referendària), de sa difesa de su princípiu chi asuba de su beni àcua nisciunu depit spricuai e guadangiai (3° dimandha referendària), in s’afirmadura chi a fac’e sa lei totus seus agualis a cumentzai de is capus mannus (4° dimandha asuba de su ‘legittimo impedimento’). De su mantessi parri est sa Cgil. Sighi a ligi ‘Referendum. Cgil e Css: “Su 12 e su votaus cuatru eja”’
(IlMinuto) – Casteddu, 6 de su mes’e làmpadas – A pagus diris de is referendum funt sèmpiri de prus is apellus e is atóbius in difesa de s’àcua comenti beni comunu. A Manca pro s’Indipendentzia cumbidat a votai “2 EJA contr’a sa privatizatzioni de s’àcua e po unu caminu chi lompit a nazionalitzai is risorsas ídricas sardas”. “Su 12 e su 13 de su mes’e làmpadas – precisat aMpI – lamaus is traballadoris sardus a s’epressai asuba de un’àtera destrossa made in Italy, est a nai sa privatizatzioni de sa gestioni ídrica. Est importanti chi su pópulu sardu dongat unu signali de arrialia a sa privatizatzioni de s’àcua”. Sighi a ligi ‘Referendum, aMpI: ” EJA contr’a sa privatizatzioni de is risorsas ídricas”. In Aristanis dibbàtidu “Àcua beni comunu”’
(IlMinuto) – Casteddu, 3 de su mes’e làmpadas – “A pustis de s’arrasutau de su referendum regionali contr’a su nucleari est necessàriu afortiai su sceberu chi at biu su 97% e pagu prus de is eletoris sardus votai Eja in su referendum natzionali e conttribuendi a lompi a su quorum”. Est candu narat cun d-una su Cumitau “Vota SI per fermare il nucleare” a pagus diris de su votu referendàriu de su 12 e de su 13 de su mes’e làmpadas. “Su Cumitau – si ligit in d-una nota de imprenta – isperat chi su Presidenti de sa Giunta regionali no torrit agoa a fac’e custu referendum e sigat cun su mantessi impignu tentu po su referendum sardu”. Asuba de is cuatru refendum fueddat puru Alessandro Corona, cordinadori regionali de su Pdci. Sighi a ligi ‘Referendum: Cumitau “Vota SI per fermare il nucleare”. “Cappellacci no torrit agoa”. S’apello de Pdci’
(IlMinuto) – Casteddu, 2 de su mes’e làmpadas – Giogus e giocaglieris, informatzioni e ispetàculus in pratza po ammentai ca s’àcua est unu diritu e no est una cosa de bendi. Domínigu chi benit in Pula – primu de is referendum de 12 e de 13 de làmpadas – s’at a tenni sa manifestada “L’acqua è di tutti”.
S’apuntamentu est po is 10.00 in pratza de su Pópulu aundi, fintzas a is 13.00, artistas, assótzius e imprendidoris ant a cumbidai a sa genti de su logu de calisisiat edadi a meditai impari asuba de su beni ídricu comenti – precisant is aprontadoris de su cumitau referendàriu “2 SI per l’acqua bene comune” – “beni primàriu de amparai puru atressu de sa gestioni púbblica sua, una gestioni bona “partecipata” e cuntrollada de is citadinus”. Sighi a ligi ‘“S’àcua est de totus” in Punla informatzioni e ispetàculus a una cida de is referendum’
(IlMinuto) – Casteddu, 30 de su mes’e maju – Sighit sa batalla de Sinonucle. Agoa de sa bitória de su 15 e de su 16 de su mes’e maju, s’Esecutivu de su Cumitau at decidiu de s’impegnai puru in is referendum de su 12 e de su 13 de su mes’e làmpadas. Su Cumitau – si ligit in sa delíbbera aprovada cida passada in Aristanis – “At stabbiliu de s’impegnai, cun sa mantessi frimmesa [...] chi at tentu po su referendum consultivu regionali, in sa pubblicidadi de s’EJA in su referendum contr’a su nucleari e in is duus referendum contr’a sa privatizatzioni de s’àcua. Po su referendum asuba de su “legittimo impedimento” su cumitau s’agat de acórdiu cun sa necessidadi chi totus is citadinus siant agualis ananti de sa lei”. Asuba de su mantessi tema est stetiu fattu connosci s’apellu “Quattro leggi infami”, firmau de “Sinistra Critica”, “Collettivo Marxista-Leninista” de Nùgoro, Círculu Prc de Aristanis 2 e Vincenzo Pllai (Prc). Sighi a ligi ‘Referendum: su 12 e su 13 de su mes’e làmpadas Sinonucle contr’a su nucleari e sa privatizatzioni de s’àcua. Apelli contr’a “Cuatru leis aggraviosas”’
(IlMinuto) – Casteddu, 26 de su mes’e maju – Su Consillu provintziali de su Campidanu de Mesu narat de nono a sa privatizatzioni de s’àcua. Abetendi a su referendum de su 12 e de su 13 de su mes’e làmpadas s’assembrea at difatis aprovau a s’unanimidadi un’odg – presentau de su grupu comunista de sa Fds- chi proponit de insertai in su statutu provintziali s’arreconnoscimentu de su “diritu a sàcua comenti diritu umanu universali e su status de s’àcua comenti beni púbblicu”. Sighi a ligi ‘Referendum àcua: Provìntzia de su Campidanu de Mesu: “Stop a sa privatizatzioni”’
(IlMinuto) – Casteddu, 19 de su mes’e maju – “Su pópulu sardu est stracu de fabas”. Aici su diretivu natzionali de a Manca pro s’Indipendentzia cummentat a is afirmaduras de su Ministru po is raportus cun su Parlamentu, Elio Vito, asuba de sa bitória de is EJA – cun su 97,13% – de su referendum contr’a su nucleari chi s’est tentu su 15 e su 16 de su mes’e maju – acrarat aMpI – “afirmat ca s’ésitu de su referendum consultivu est significativu scéti de s’ategiamentu de sa genti sarda e no de sa boluntadi de s’Itàlia e duncas ndi declarat s’illegalidadi. Ma no est totu. Su Ministru, sennori italianu, declarat cun ignòrantzia e barrosia ca in Sardigna no ddoi est stetia una campagna informativa giusta asuba de s’acasigiu de is centralis nuclearis e de is depósitus de aremus, poita no s’est fueddau comenti si depit de is ‘arriscus’ e de is ‘possibbilidadis’ chi custas donant a sa terra nostra, una terra de sèmpiri stuprada de s’Itàlia”. Sighi a ligi ‘Nucleari. “Cun sa bitória de su referendum cumentzat su camminu de soverania e indipendentzia”, aMpI arremaciat a is fueddus de su Ministru Vito’
(IlMinuto) – Casteddu, 17 de su mes’e maju – Sa Sardigna bullat a su nucleari. Su 15 e su 16 de su mes’e maju 880.171 sardus – su 59,49 po centu de chini tenit diritu – at participau a su referendum consultivu serrendi s’istrada a su fàbbricu de centralis nuclearis e depósitus de aremus radioativus in s’Ísula. Cun su 97,98% de is EJA contr’a su nucleari de sa Sardigna, a pagu prus de de duus mesis de s’arruina de Fukushima, si pesat unu messagiu craru a su mundu. “At essi unu messagiu mannu – cummentat su cordinadori de su Cumitau Sinonucle Bustianu Cumpostu – chi si movit de unu pópulu pitiu, chi perou tenit un’ istória manna. Su messagiu ‘For a world nuclear free’ est scritu cun su linguàgiu universali de sa música i at arribbai a totu sa genti chi bolit un’àteru tipu de raportu cun mammai terra”.
Po a Manca pro s’Indipendentzia – chi at fattu una campagna contr’a su nucleari autónoma cun diversas assembreas in totu s’Ísula – s’ésitu de su referendum est “una bitória de is fortzas indipendentistas”. “Custa est – cummentat aMpI – un’istraordinària proa de fortza de su pópulu sardu chi at fiamenti decídiu de sighiri a is fortzas sanas de sa natzioni sarda mancai sa mudesa carraxera de is partidus italianus e de is sindacaus chi, linendi scéti calencuna eccetzioni isolada, ant boicotau a sa campagna”. Custa invecis s’opinioni de Gianluigi Deiana de Sinistra Critica. Sighi a ligi ‘Referendum: 850milla sardus serrant s’istrada a su nucleari. Cumpostu: “De s’Ísula unu messagiu po su mundu”’
(IlMinuto) – Casteddu, 16 de su mes’e maju – Su referendum asuba de su nucleari est bàlidu. A is 22.00 de ariseru su 39,83% de is eletoris sardus iat participau a su votu superendu a su quorum de su 33% previdiu de sa lei regionali. Is urnas ant essi obertas oi puru po totu su mangianu in totus is comunus de sa Sardigna. Fintzas a is 15.00 at essi ancora possíbbili arrespundi a sa dimandha: ““Ses contràriu a s’installatzioni in Sardigna de centralis nuclearis e de situs po su depósitu de ferrinas radioativas avantzadas o presistentis?”. Sighi a ligi ‘Referendum nucleari: otentu su quorum. Urnas obertas fintzas a is 15.00′
Social
