(IlMinuto) – Casteddu, 28 de su mes’e làmpadas – Sa Sardigna si cunfirmat una terra de coru bonu. Funt difatis 21milla is sardus tra is 18 annus e is 55 annus iscritus a su Registru regionali de is donadoris de su mueddu de s’ossu. Po milli abitantis in s’Ísula su 23,14 de is personis ant a podi agiudai sa vida de àtera genti. Pighendu in cunsidériu su númeru de is abitantis suus, custu est unu datu chi bit sa Sardigna a su primu postu comenti númeru de iscritus. Cun su trapiantu – si ligit in d-una nota – benit fattu su càmbiu de su mueddu de s’ossu malàdiu cun céllulas sanas, capassus de regenerai su sànguini”. In Sardigna, de su 1992, ant giai donau su mueddu de s’ossu 149 personis. In su 2010 funt stetius noi is sardus a donai su mueddu. Sighi a ligi ‘Trapiantu de su mueddu de s’ossu: In Sardigna record de donadoris’
Archíviu de s'argumentu 'solidariedadi'
(IlMinuto) – Casteddu, 21 de su mes”e gennàrgiu – Sighint is eventus de “Libera” e de “Sardegna Solidale” contra a sa mafia. Cras, in sa sedi de s’Istitutu “comprensivo” de Crabas, Pasquale Campagna at a contai a is istudiantis, ancora una borta, s’istoria de sa sorri Graziella, bocia in su 1985, a s’edadi de 17 annus, de unu traficanti de droga palermitanu Gerlando Alberti junior, nebodi de s’omònimu boss de “Cosa Nostra”. “Graziella – si ligit in d’una nota – beniat de una família mudesta, seti fradis, sorri de unu carabineri, traballàt in d’una lavanderia. Fiat stetia rapia in sa frimmada de su postali e bocia cun cincu corpus de lupara in Forti Camponi, in su buscu de Musolinu, poita si furiat impossessada de unu geravallieddu scaresciu in d’unu bistiri portau de Gerlando Alberti junior in sa lavaderia aundi traballàt”. Sighi a ligi ‘“La vita rubata”: in Crabas Pasquale Campagna contat s’istoria de sa sorri bocia de sa mafia a s’edadi de 17 annus’
(IlMinuto) – Casteddu, 28 de su mes”e de paschixèdda – Est andau a Giovanni Salis de su grupu tataresu de Emergency su prémiu de Annunou “Nuraghe”2010, cumpartu “Diritus civilis”. Su prémiu esti stetiu donau su 18 de su mes”e paschixèdda, in sa saba de su consillu de su comunu de Tàtari, de sa Consulta provintziali po su voluntariau. Sighi a ligi ‘Voluntariau: a Giovanni Salis de Emergency su prémiu “Nuraghe”2010′
(IlMinuto) – Casteddu, 22 de su mes”e paschixèdda – Arregolli dinai po agiudai a Emergency e informai a sa genti asuba de is progetus fattus in su mundu de s’assótziu. Funt custus is obbietivus de su mercau de paschixedda chi s’assótziu de Gino Strada at aprontau in Tàtari e in Tissi. Medas is apuntamentus aprontaus de is ativistas de Emergency. Oi, po tutu sa diri, at essi possíbbili agatai su banchixeddu in su Centru cummerciali “La Piazzetta”, cras e cenàbara 24 (scéti a su mangianu) Emergency at essi presenti in pratza Azuni e infinis mérculis 29, a cumentzai de is 21.00, su banchixeddu at essi allestiu in s’ExMà de Tissi, po su concertu de Francesco Piu e Paolo Bonfanti. Sighi a ligi ‘Solidariedadi: in Tàtari su mercau de Paschixedda de Emergency’
(IlMinuto) – Casteddu, 23 de su mes”e totussantus – Est tempus de Brothers of Rock. S’editzioni 2010 de su memorial dedicau a Luca e Bobo Chiarelli s’at a tenni domínigu 28 de su mes”e totussantus in s’Fbi de Quartu Sant’Aleni (bia Brigata Sassari 68) a cumetzai de is 21.00. In su 2009 s’eventu at permitiu de arregolli casi 30 iscritus nous a su registru de is donadoris de su mueddu de s’ossu. Fortuna chi is aprontadoris sperant de torrai a arripiti, e superai, puru ocannu. Sa donatzioni, cun ténnicas delicadas, donat sa possibbilidadi difatis de sanai fintzas a s’80 po centu de is talassemicus. Aici comenti teniant s’Anemia mediterranea Luca e Bobo: “Piciocus miríficus – custus is fueddus impitaus de is amigus po ammentai a is duus fradis cun d’un’amori po su rock atacadinu – senz”e issus oi no iaus a essi cussu chi seus”. Sighi a ligi ‘Brothers of Rock II: domínigu e Cuartu su memorial Luca&Bobo 2010. Obertas is iscritzionis a su registru donadoris mueddu de s’ossu’
(IlMinuto) – Casteddu, 28 de su mes”e cabudanni – “Su volontariau in Sardigna”. Est custu su tema de cuncursu po tesi de laurea o traballus de ricerca bandiu de su Centru Serbítzius Solidali. Po fai su cuncursu est dimandau su diproma de laurea universitariu, de sa laurea (de su ordinamentu béciu e de su nou, laurea triennali, laurea specialistica) o de su dotorau de ricerca, laureas pigadas puru in àteras regionis italianas. Sighi a ligi ‘Volontariau: cuncursu po tesi de laurea e ricercas. Prémius po 15milla eurus’
(IlMinuto) – Casteddu, 4 de su mes”e làmpadas – Calencuna borta sa solidariedadi viagiat asuba de una “canoa”. Su campioni de kayak e testimonial de Amref, Franco Gambella, est torrau in is diris passadas in Terranòa a sa fini de una “missioni” de 10 diris in Kenya.
In su stadu africanu Gambella at fattu una bisita in su lagu Vittoria e una bisita guìdada in is diversus campus Amref, portendi in Kenya sa solidariedadi de Terranòa: 40milla eurus chi Francesco Gambella at arregotu grazias a is acuntéssias promòvias de s’amministrazioni comunali e a s’impignu de meda genti de bonu coru chi dd’at agiudau. “A cumenzai – si ligit in d’una nota – de is istudiantis de su Scientificu chi ant arregotu prus de 3milla eurus destinaus a su fràbbicu de unu puzu in d’una bidda de Makueni”.
(IlMinuto) – Casteddu, 5 de su mes”e maju – “Sardegna Solidale” s’arrebbellat. Po su comitau diretivu de su Centru serbízius Sa.Sol su provedimentu de su Guvernu chi ndi liat is tarifas postalis prus bàscias – cun d’un’aumentu de su 500 po centu de is ispesas de mandada – ferrit a su coru de su volontariau in totu su territoriu nazionali.
“Su Comitau diretivu de su Csv ‘Sardegna Solidale’ – si ligit in d’una nota – in s’atóbiu de su 13 de su mes”e arbili de su 2010 at decidiu a s’unanimodadi su strúnciu prus sicu a su provedimentu de su Guvernu chi ndi liat debressi is tarifas po is mandamentus postalis de is entis no-profit”.
“Su Csv ‘Sardegna Solidale’ – sighit su testu – ponit in luxi sa circustànzia de discumbéniu meda grai po medas associazionis, biu ca custa mesura aumentat de meda is costus po su volontariau e po su no-profit in generali, própriu in d’unu momentu aundi s’òpera de su volontariau iat a andai agiudada meda de prus”.
“S’aumentu de is ispesas postalis – precisat su documentu – est pagu prus de su 500 po centu, est a nai ca si superant is 65 millionis de eurus chi ant a andai a sbuidai is cassas de is oraganizazionis mannas e piticas in Italia, castighendi is progetus e is atividadis de dogniuna e impedendi sa circulazioni de una líbbera informazioni de basi”.
Social
