> Su progetu | ilMinuto

Su progetu

Su giornali

IlMinuto notizie Mediterranee – su primu e únicu giornali online totu in sardu e in italianu – nascit cun su disígiu de contai s’àtera Sardigna: cussa de is milla assótzius e progetus, de is disterraus, de is sardus in su mundu e in s’ísula, de su sport praticau de chini no est professioneri e de sa cultura, de sa política bívia comenti un’impignu civili.
Senz”e istrobbus de parti de editoris incómodus, IlMinuto bollit oberri unu garropu in su muru de is novas regulàdas de is meris mannus.
Is ligidoris ant a podi intrai in cuntatu cun novas claras e istincas, líbberas, annoadas de su lúnis a su sàbudu. Ancora, ant a podi puru participai a costruiri su giornali, signalendi fatus e apuntamentus, mandendi fotografias, notas e comunicaus.
Sa genti at a ligi is novas de sa dì, at a podi consultai s’archíviu e ligi sa Newsletter de sa cida.

Su sardu de dógnia diri

Comenti iscririt Antonio Gramsci “is régulas de sa Grammàtica iscrita presuponint [...] sèmpiri unu sceberu, un’indiritzu culturali”. Po cust’arrexoni su sceberu nostru s’est orientau, comenti iat a nai Arrigo Castellani, a su sardu de s’impreu normali, est a nai su sardu de dógnia diri, una língua chi cun abbilesa passat de s’iscritura a sa chistionada senz”e trincus. Su sceberu, scéti po su sardu campidanesu, est duncas cussu de s’iscola de Blasco Ferrer.

Su catalanu

Movendusì de su disígiu de portai ainnantis un’isfida chi tenit comenti centru su Mediterraneu s’archíviu de IlMinuto presentat unu sceberu de novas in língua catalana, tradusias de Gemma Segura Busuldu.

S’iscopiadura de testus e immàginis

Su riassuntu o s’iscopiadura de testus o de partis de custus funt regulaus de sa lei po su diritu de autori n.633 de su 1941. S’iscopiadura de immàginis e vídeos est regulada de s’artículu 70 de sa mantessi lei.