In Triuraghes sa “Cantina Angelo Angioi” produit binos bonos e famados

In prus de sa Malvasia, Angelo Angioi traballat finas Cannonau e Vermentinu
13 Giugno 2020
cantina angioi

* Dae sa terra a sa butìllia * - Sa “Cantina Angelo Angioi”, chi at sa domo sua in Triuraghes, biddighedda in provìntzia de Aristanis a deghe chilòmetros pagus prus o mancu dae Bosa, at un'istòria de prus de chent'annos. Difatis, su caminu suo est cumentzadu in s'annu 1907, cando su bisàgiu de Angelo Angioi, su mere atuale, at comporadu sas terras de su Sartu de Coloras. Unu sartu, custu, chi s'agatat in una campeda de carcare, a 180 metros dae subra de su mare.

A pustis de s'achistu, in Coloras est cumentzada un'operatzione de bonìfica; posca, pro unu sèculu sos terrinos suos sunt istados coltivados a trigu.

In sos primos annos de su 2000 Angelo at eredadu su sartu dae su babbu, at traballadu sos terrinos e at pastinadu sas bides de Malvasia. Oe custas matas produint sos binos bonos e famados de sa cantina sua.

Sas bìngias de Angelo Angioi sunt allevadas a guyot e onni annu sa binnenna si faghet durare duos meses, sighende passu passu sa maturatzione de sos budrones de s'àghina.

Tocat a nàrrere puru ca sas bìngias de sa "Cantina Angelo Angioi" ant un'espositzione particulare, in cara dae su Golfu de Bosa. Non est est pro nudda ca sunt tocadas dae su Bentuestu.

Acabada sa binnenna, a pustis de sa catigadura, sa fasa de s'incubonadura si faghet cun madrighes isseberadas e durat pro bator meses.

Cun sa punna de otènnere unu produtu de calidade manna, in cantina si còmpidat onni cosa, finas sa temperadura a pustis de s'incubonadura. Posca, sos binos pasant o in carradas de linna o in atzàrgiu.

A sighire sas bèvidas si ponent intro de sas ampuddas.

Dae sas bides allevadas dae sa “Cantina Angelo Angioi” si faghet feti “Malvasia di Bosa D.O.C.”. Semper e cando, custa realidade produit puru binos nieddos “Cannonau di Sardegna D.O.C.” e àteros biancos primorosos comente su “Vermentino di Sardegna D.O.C.”, ma s’àghina de Cannonau e sa de Vermentinu sunt comporadas dae bingiateris azenos.

Sos binos Malvasia cun eticheta “Cantina Angelo Angioi” sunt de tres tipos: su “Salto di Coloras Malvasia di Bosa D.O.P. 2014”, unu binu durche e friscu; su “Salto di Coloras Malvasia di Bosa D.O.P. 2013”, una bèvida cun sabores chi regordant sos barracocos, sos indàtulos e sa figu; su “Salto di Coloras Malvasia di Bosa D.O.P. 2010 – Riserva”, unu binu chi cumprit pro bator annos in carradas de orrole e chi est bonu a lu bufare mandighende durches tìpicos sardos o pipende unu bellu zigarru.

In fines, comente si podet intuire, custa realidade produtiva faghet finas unu Cannonau, su "Scultone Cannonau di Sardegna DOP 2014", unu binu carcu e elegante, e unu Vermentinu, su "Filicario Vermentino di Sardegna DOP 2014", una bèvida bona pro acumpangiare màndigos de mare.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aggiungi un commento