Cun “Lollovers” po su turismu sustenìbili

Su progetu de Simone Ciferni valorizat unu brugu iscarèsciu
25 Marzo 2021
terra

Terra – Trasformai Lollobe fadendidda mudai: de brugu iscaresciu de sa genti a prenda de su turismu sustenìbili. Est custa sa punna de su progetu “Lollovers”, fillu de sa conca de Simone Ciferni.

“Lollovers” est unu progetu de turismu digital Detox, una manera de fai turismu chi libberat sa genti de sa tecnologia digitali. Una proposta chi tenit comenti protagonista sa biddixedda de Lollobe, logu innoia bivint pagu prus o mancu de 13 personis.

Cun impignu mannu Simone Ciferni at trasformau cussus chi podiant èssiri cunsideraus comenti fatoris de isvàntagiu - s'isulamentu, s'asusèntzia de serbìtzius e su sbuidamentu de sa genti – in un'oportunidadi manna.

Mancu a ddu nai! Su progetu interessat is chi bivint in su brugu e is chi si ndi funt innamoraus puru. Comenti est possibbili totu custu? Simpli, atressu de su recùperu de is traditzionis.

“Lollovers” arrennexit a valorizai is tradizionis cun nd'una proposta turistica interessanti: oferrit a su furesteri unas cantu esperiètzias ùnicas chi ddi faint cumprèndiri is usàntzias de su brugu. Cun s'agiudu de is artesanus lollobesus, difatis, su progetu de Ciferni tenit sa punna de imparai is mestieris tìpicus a is furesteris chi lompint in su brugu.

lolloversBisòngiata a sutalineai ca Lollobe est unu logu innoia non pigat nimancu su telefoneddu, una biddixedda chi regalat a su biagiadori un'ambienti ammainadori. Oi, chini andat a Lollobe podit torrai a iscobèrriri su brugu de unu sèculu fait atressu de sa domu museu de sa famìlia Chessa. Ma non est totu, poita comenti eus giai nau, cun “Lollovers” su furesteri at a tenni po finas sa possibilidadi de imparai is mestieris tìpicus de su brugu. Po fai un'èsempiu, gràtzias a s'insignamentu de tzia Giuseppina Tolu s'at a podi imparai a fai sa pasta sarda e is paneddas.

Bìncidori de su prèminu sustenibilidadi de sa “Coldiretti Giovani”, Ciferni est una de is boxis sardas prus importantis in matèria de turismu “slow”, est a nai unu tipu de turismu chi si fundat asuba de s'esperèntzia direta. Unu turismu chi fait bìviri a chini ddu fait sa simplesa de una vida chi in diri de oi non si connoscit prus.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags