Unu progetu po cumprèndiri su gradu de sustenibilidadi chi pertocat a unus cantu logus turìsticus

S'"Agenzia Conservatoria delle Coste” ghiat su “Profile of Sustainability in some Mediterranean tourism destinations”
28 Luglio 2021
terra

Terra - S'“Agenzia Conservatoria delle Coste”, chi fait parti de su sistema ambientali aprontau de sa Regione Autònoma de Sardigna, est sa ghia de su progetu intitulau “Profile of Sustainability in some Mediterranean tourism destinations”. Unu progetu chi sa “Conservatoria delle Coste” fait impari cun s'UNEP (United Nations Environment Programme) e su MAP (Mediterranean Active Programme). Una proposta sustenìbili chi bit po finas s'amparu de su “Plan Bleu”, tzentru de fainas regionalis de su MAP e de s'UNEP etotu.

Gràtzias a custu progetu is istudiosus funt cuncodrendi un'anàlisi de is datus econòmicus, sotzialis e ambientalis de unus cantu logus turìsticus chi s'agatant in su Mediterraneu.

Ma cali est sa punna de su “Profile of Sustainability in some Mediterranean tourism destinations”? Sa respusta no est difitzili po nudda: s'obietivu est su de cumprèndiri su gradu de sustenibilidadi chi pertocat a is logus turìsticus esaminaus.

Is territòrius sardus sceberaus po fai cust'analisi funt su de Crabas e su de Casteddu Sardu, chi rapresentant duus ambientis naturalis e culturalis innoia su turismu mantenit caraterìsticas pretzisas.

Bisòngiat a nai, perou, ca is territorius mediterraneus sceberaus po custu progetu funt medas: su de Tipaza in Algeria, Rovinj in Croazia, El Alamain e Marsa Matrouh in Egitu, Chefchaouen in Marocu, Torremolinos in Ispagna, Jerba in Tunisia e Alanya in Turchia.

Non est totu, poita su “Profile of Sustainability in some Mediterranean tourism destinations” si sboddicat in cuatru partis: sa primu istudiat is resursas turìsticas chi s'agatant in dogna territòriu nominau; sa de duas pertocat is acapiòngius intre turismu, economia, sotziedadi e ambienti; sa de tres est sa parti de is efetus de su turismu po sa sa sustenibilidadi de is territòrius esaminaus; sa de cuatru pertocat is polìticas turìsticas e de sustenibilidadi.
 

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags