Dae Marzani a Cantina Deidda: s'istòria de un'azienda sarda chi fàghet ispumantis de calidade

* Dae sa terra a sa butìllia * –  Est famada pro àere bìnchidu su cuncursu internatzionale de s'annu 2015 Grenache du Monde e sa medàllia de oro pro su binu Mariano IV (annada 2010). Semus faeddende de sa Cantina Deidda de Simaghis, una bidda in provìntzia de Aristanis. Su prèmiu Grenache du Monde est lòmpidu dae Perpignanu, una tzitade de sa parte Nord de sa Catalugna, in s’istadu frantzesu, e cabu-de-logu de su Dipartimentu de sos Pireneos Orientales. Custa est una terra de binos famados in ue s’atòbiant traditziones culturales e enogastronòmicas importantes, comente cussa catalana, pirenàica, otzitana e frantzesa.

Nàschida in su 1998 cun su nùmene de Marzani Spumanti, sa cantina est fìgia de un'idea de Gianpiero Deidda, su primu in s'ìsula de Sardigna chi at produidu ispumante cun Mètodu Clàssicu.

S'issèberu de su nùmene Marzani bogat a campu su sonu sincheru de sa pronùntzia simaghesa de sa paràula "marxani", e est acàpiadu a s'annomìngiu de sa gente de sa bidda. Marzani, difatis, est s'italianizatzione de sa paràula marxani. Sa chi pariat un'aconcada de su mere Gianpiero Deidda est istada imbetzes una novidade de importu pro sa Sardigna enològica e pro sos bingiateris sardos chi faghent ispumantes cun àghina autòctona.

Oe su nùmene Marzani est iscritu in totus sas etichetas de ispumante produidu cun su Mètodu Clàssicu, mentres chi su nùmene de sa dita est mudadu in Cantina Deidda, essende chi sa produtzione oe pertocat a àteros binos, totus fatos cun variedades tìpicas de àghina sarda, comente su Cannonau, sa Grannatza e sa Mònica.

Totu su traballu fatu in sa cantina Deidda est unu traballu màstrinu. Sa produtzione Deidda est fata de ispumantes brut, mescamente de blanc de blancs, produidos cun àghina bianca. A custos binos s'agiunghent unu rosé e unu blanc de noirs, su Marzani Fleur, fatu cun àghina niedda de ratza Cannonau e Mònica, iscubonadu comente binu biancu e ispumantizadu a pustis in intro de is ampullas. In fines est de pònnere in evidèntzia chi, comente sas àteras operatziones, fintzas su remuage de sas ampullas no est mecànicu, ma totu su traballu est fatu a manu cun passèntzia manna girende ogni ampulla in modu de fàghere calare sa feghe a s’ala de su tapu, pro la pòdere eliminare.

Su catàlogu de Deidda incluit binos biancos comente su Vermentinu de Gaddura DOCG "Liboriu" e binos nieddos comente su Cannonau de Sardigna DOC "Mariano IV".

Passione, cumpetèntzia tècnica, traditzione e innovatzione sunt sas raighinas de sa filosofia de sa Cantina Deidda, un'azienda chi, pro mèdiu de su binu, dae sa prima die de bida at traballadu cun sa punna de contare a chie lu assàgiat, unu territòriu intreu e s'istòria sua.