Olianas: un'azienda sarda chi proponet binos chi ant sa sabidoria antiga

S'economia de su territòriu in bèvidas de calidade, richesa de su chi produit sa terra
19 Martzu 2020
olianas bides

* Dae sa terra a sa butìllia * Cultibu biointegrali, valorizatzione de sas bides autòctonas, incubonadura in brocas e imbetzamentu in tonneaux sunt sos elementos chi caraterizant sa cantina Olianas de Xrexrei, una biddighedda de su Sarcidanu.

Est in custu territòriu de Sardigna chi s'imprendidore Stefano Casadei, lòmpidu dae sa Toscana pro fàghere una consulèntzia a s'amigu Artemiu Olianas, mere de una tanca de dòighi ètaros, agatat unu bisu. Inoghe, difatis, s'innamorat de su logu e detzidet de abarrare. Pro issu, difatis, custu est su logu giustu pro pònnere in òpera su progetu de pastinare una bìngia bio-integrali.

Motore de sa sotziedade nàschida dae Artemiu e Stefano est su cumparztimentu de una filosofia chi cheret una cosas feti: fàghere binos de calidade respetende s'ambiente, sa natura e sa genti chi ddoe bivit.

Su traballu in bìngia est agiudadu dae sas berbeghes, dae sas cocas e dae sos caddos, chi innetant sos giuales dae su cadone e contzimant su terrinu. In sa possidèntzia Olianas non si impreant produtos chìmicos in sas bides. Difatis, s'azienda produit binos bio-integrales dae bides autòctonas ( Muristellu, Cannonau, Carignanu, Vermentinu e Nascu) e dae bides istràngias (Merlot, Cabernet-Sauvignon, Tintillu, Montepulciano d'Abruzzo e su Syrah).

Sas bides a pibione nieddu, Muristellu e Cannonau, sunt coltivadas in una banda de sa bìngia amparada dae su bentu. A s'imbesse, su Carignanu est prantadu in una zona basada dae su bentu. Sas bides a pibione biancu, imbetzes, sunt istadas pesadas in su terrinu prus artu de sa bìngia.

In s'azienda Olianas sa binnenna est fata a manera rigorosa feti a manu. Sa data de regorta est istabilida a pustis de àere fatu unu controllu contivigiosu de su sabore e de sas caraterìsticas chìmicas (tzùcaros, polifenolos e aghedùmene) de s'àghina.

Sos binos biancos e sos binos nieddos de custa cantina sighint incubonaduras cun madrighes autòctonas. Onni fase de sa vinificatzione s'isbòligat respetende sa calidade de sas àghinas. Difatis, totus sas etichetas Olianas sunt binos sanos e de sabore.

olianas binos

"Vermentino", "Rosato", "Rosato Brut Metodo Classico", Cannonau, "Cannonau Riserva" e “Perdixi” sunt sas propostas interessantes firmadas de Olianas.

Fatu cun àghina Vermentinu chentu pro chentu, su "Vermentino" est unu biancu chi at una capatzidade de imbetzamentu de 3-4 annos. Custu binu est perfetu pro lu bufare comente aperiente e pro acumpangiare màndigos de pische cundidos bene.

Su "Rosato" est unu binu "IGT Isola dei Nuraghi". Custu binu est su resurtadu dae unu blend de àghina Cannonau (80%) e àghina Vermentinu (20%). Bonu comente aperiente, "Rosato" est sa bèvida adata pro sos màdigos de crostàceos, soufflé e petza de pudda.

Rosadu e elegante, su "Rosato Brut Metodo Classico" at nuscos de frùtora ruja e est unu binu estremadu a lu bufare assaporjande tartare de tonnina, pische cruu e Cappunadda a sa Carlufortina.

Produidu cun su 95% de àghina Cannonau e cun su 5% de àghina Tintillu (alicante bouschet), s'eticheta Cannonau espressat bene sos sabores de Sardigna. Custa bèvida interessante est bona meda a la bufare mandighende antipastos, pasta e culurgiones.

Cun una capatzidade de imbetzamentu de 10 annos, su "Cannonau Riserva" est unu binu fatu cun àghina Cannonau chentu pro chentu. Primorosu cun petza de porcu e petza de angione.

"Perdixi", imbetzes, est unu binu fatu cun àghina Muristellu (75%) e Carignanu (25%). Una bèvida ùnica, chi leat su nùmene suo dae sas perdighes chi bivent in sa possidèntzia. Licanzu cun petza de boe, petza de catza e casu istasionadu.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu