Cantina Sardus Pater: 200 ètaros de bìngia incornissada dae una magra mediterrànea bella e nuscosa

Binos sardos produidos cun àghinas autòctonas, bèvidas primorosas chi ant àpidu prèmios meda
2 Arbili 2020
cantina sardus pater

* Dae sa terra a sa butìllia * Sa terra sua est sa de s'ìsula de Sant'Antiogu. Est inoghe, difatis, chi naschet sa Cantina Sardus. In su 1949, in su cabu de giosso de Sardigna at bidu sa lughe sa “società cooperativa a.r.l.”, realidade produtiva chi at cumentzadu su traballu suu unos cantos de annos ivatu, in su 1955.

Cun su tempus sa produtzione de sos binos propostos est istada megiorada meda e sa Cantina s'est impignada a avalorare sa bide de Carignanu.

Sas àghinas batidas de sos sòtzios (200 ànimas) sunt binnennadas in 300 ètaros de terra coltivados a bìngias. Su prus de sas bìngias sunt coltivadas a Carignanu e sas prus mannas de edade s'agatant in s'ìsula de Sant'Antiogu.

Sunt bìngias chi ant a su nessi 50 annos, pastinadas in terrinos renalzos, cun una produtividade pro ètaru bàscia meda e de calidade manna. Est pròpiu de custas bìngias chi oe sa Cantina Sardus Pater produit sos binos nieddos prus bonos.

Dae sa binnenna de su 1994 sa Cantina cumentzat un'àtera produtzione de valore: sa de su Vermentinu. In prus at una produtzione minore de Monica e de Cannonau puru, e finas de Muscadeddu e de Nascu de bides autòctonas.

Totus sas etichetas propostas sunt su resurtu de un'issèberu atentu de sas àghinas e de sos traballos contivigiosos fatos in cantina. Petzi gosi si proponet a sos clientes unu binu primorosu.

sardus pater

Onni eticheta firmada Sardus Pater at sa figura de sos repertos archeològicos agatados in sos vàrios iscavos de chirca isboligados in s'ìsula de Santu Antiogu.

Sìmbulu fitianu de totus sas ampuddas est sa moneda fabricada in Santu Antiogu in època romana chi rapresentaiat su Sardus Pater, est a nàrrere su babu de sos sardos.

Sa proposta de sa Cantina est fata de binos nieddos e binos biancos.

Arruga, Is Arenas, Nur, Kanai, Is Solus, Horus, Foras, Insvla e Sardus Pater 70 sunt sas etichetas de binu nieddu. Lugore, Terre Fenicie e Elat sunt sas propostas de binu biancu. Faghent parte de sos passitos sos binos Amentos di Carignano, Amentos di Moscato e Amentos di Nasco. In tames non est acabada inoghe, pro ite sa Cantina Sardus Pater produit un'ispumante puru: su AD 45, una bèvida fata cun àghina Vermentinu chentu pro chentu.

Onni ampudda Sardus Pater est un'iscoberta ispantosa pro su paladu. Sas de custa cantina sunt bèvidas chi praghent e chi ant logradu prèmios meda. Tra sos ùrtimos, in su 2020 su binu Arruga 16 at batidu a domo su Silver Medal de Mundus Vini. Su matessi binu est binchidore de su Golden Medal puru, prèmiu de su Berliner Wine Trophy.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu