Sos ristorantes de Sardigna e sa ghia de “Identità Golose”

S'osteria “Abbamele” de Mamujada est sa novidade sarda de su 2022
10 Martzu 2022
in sa mesa

In sa Mesa - Lompet a sa de bìndighi editziones sa ghia "Identità Golose". Sas ischedas de ocannu sunt 1.055 in totu, mentras sas insignas noas sunt 218, 100 sas pitzerias. Dae 15 annos sa ghia "Identità golose" faghet una descritzione pretzisa de su mundu de sa coghina italiana abbaidende a sa calidade, a sa creatividade e a sa chirca.

Tra sas novidades de sa ghia 2022 agatamus s'osteria de Mamujada "Abbamele", de su chef Mauro Ladu . Mauro, a pustis de àere fatu esperièntzia in logu istràngiu, est torradu a bidda sua pro pònnere in òpera unu bisu chi at batijadu "Abbamele". Sa coghina de su chef Mauro Ladu est una coghina licanza e at unu sabore perfetu: a la caraterizare est sa coja tra tècnica, ingredientes e retzetas.

in sa mesaNo est totu, pro ite tra sos ristorantes nàschidos dae pagu tempus agatamus peri su "Mema" de Pula, una realidade ghiada dae su chef Manuele Senis. In su ristorante "Mema" su menu mudat a s'ispissu. Sa resone? Simple: pro ite sa de Senis est una coghina fata feti de ingredientes de istajone. Una coghina, duncas, chi valorizat sos ingredientes de mare, sa birdura e sas erbas de sartu. Una coghina chi naschet dae sa coja tra tècnicas e referèntzias internatzionales.

Sa ghia "Identità golose" sinnalat un'àteru ristorante de interessu, unu ristorante chi s'agatat in Seddori e si lamat "Coxinendi". Inoghe su mere de sa coghina est Davide Atzeni, unu chef chi faghet atentzione a s'ambiente. Difatis, totu su chi intrat in sa coghina de Davide devet àere una trata ecologica bàscia. Dae "Coxinendi" si lompet a "Chiaroscuro de Casteddu, sa realidade ghiada dae sa chef nugoresa Marina Ravarotto in ue sos màndigos de sa maista coghinera donant importu a su ligàmene suo cun sa terra de Barbàgia. A lu contare sunt retzas famadas comente su Filindeu in brodu de berbeghe.

In Casteddu agatamus peri "I sarti del gusto", "Josto" e "Cucina.eat", mentras in Macumere lughet "Hub" de Leonardo Marongiu.

Ma non est acabada. In sa ghia de "Identità Golose", difatis, agatamus finas unas cantas cunfirmas: si andat dae sos isteddados "Fradis Minoris" de Pula a "Somu" de Altzaghena, presentados comente ristorantes primorosos de Sardigna, e si lompet a sas pitzerias isulanas chi faghent sa pitza prus bona de s'ìsula: "Sa Scolla", "Framento", "Bosco", "Re-Mi". Non fatant sos ristorantes prus clàssicos, comente su "Corsaro" de Stefano Deidda e a su ristorante de Luigi Pomata.


Attività realizzata col contributo della Regione Sardegna - IMPRENTAS 2021-2022. LR 22/2018, art. 22

© RIPRODUZIONE RISERVATA
Tags