Pianoforte, su 4 in Thiniscole su cuntzertu de Alessandro Francesco Meloni

A pustis de sos primos duos apuntamentos chitarrìsticos, sighit sa sèrie de cuntzertos promòvida e organizada dae s’iscola tzìvica MeA de Thiniscole. Sàbadu su 4 de freàrgiu, a sas 20.30 in sa domo de su Parcu de carrera de Piemonte, at a sonare su talentu pianìsticu tataresu Alessandro Francesco Meloni.

Su repertòriu propostu at a mòvere dae sa mùsica de su cumponidore Roberto Piana, comintzende dae sos “Preludi Pittorici” cummissionados carchi annu a como dae s’Ente Musicale de Otieri.

«Su tziclu de custos prelùdios – narat su diretore artìsticu de MeA Cristiano Porqueddu – sestat in mùsica unos cantos profilos de òperas nòdidas de su campu de sa pitura. Est un’inventu artìsticu prus chi no impreadu e ammajadore a beru: su pùblicu, ascurtende, est postu a tretu de chircare su gestu pitòricu e a s’imbesse».

Su cuntzertu – cun intrada a s’indonu – est organizadu dae MeA in collaboratzione cun s’assòtziu nugoresu Musicare, cun su Comune de Thiniscole e cun Doc Educational.

M.P.