Regionales, movimentos a manca. Su 14 sa presentatzione de Sinistra sarda - Europa verde - Possibile

Una «nuova identità politica» in continuidade cun su grupu regionale de Eugenio Lai
9 Làmpadas 2023
aprofundimentos

Aprofundimentu de su chenàbura - Chi sas regionales siant acurtziende·si·nche est cosa chi podimus cumprèndere movende dae unos cantos elementos. Eletziones amministrativas preparatòrias, allegas pro iscumproare possibilidades de alleàntzias, dialèticas internas a sas coalitziones e cantu b’at a rodeu. E si in su campu de su tzentru dereta sa chistione pertocat unu Solinas bis o mancu, in s’opositzione si chircat de cumprèndere cantu diat pòdere èssere largu su campu e comente.

Intre sas partes prus de manca, movende dae sos chi sunt in Consìgiu, s’idea diat pàrrere sa de fàghere una lista chi diat continuidade a su grupu “Alleanza Europa verde – Sinistra, Possibile, Art. 1chi a su presente est fatu dae consigeris elègidos cun “Noi, la Sardegna con Massimo Zedda” (Laura Caddeo e Diego Loi), “Sardegna in comune” (Maria Laura Orrù), “Futuro comune” (Antonio Piu), “Liberi e Uguali” (Eugenio Lai – cabu de grupu – e Daniele Cocco). A banda Roberto Deriu chi l’ant elègidu cun su Pd e cun su Pd abarrat.

Custu grupu est nàschidu su mese de nadale cun Piu e Loi colados dae sos progressistas de Zedda a custa agregatzione in cuota Europa verde, cun Orrù chi rapresentat a Possibile in s’assemblea sarda, cun Lai e Cocco de Articolo 1 e cun Caddeo Demos. Non b’est duncas sa parte de Sinistra italiana, in pare cun sos birdes in sa penìsula, ma chi inoghe diat pàrrere fraighende una Sinistra Futura, cun sìmbulu già prontu dae tempus (una manu aberta a ghisa de àrbore). E non bi diat dèvere èssere nemmancu Zedda, ghia de su “Partito Progressista” e cun grupu consiliare diferente (in pare cun Gianfranco satta e Francesco Agus).

Sìmbulu giai prontu finas su de su grupu mentovadu cun sas iscritas Europa verde, Possibile e Sinistra sarda, sigla chi agataìamus in s’alleàntzia Prc-Pdci de su 2014 e de su 2109. Ma custos duos partidos non sunt parte de s’allega. Semper e cando carchi cosa l’amus a ischire de prus su 14, cando custa «nuova identità politica» s’at a presentare a sas 6 de merie in su teatru Adriano de Casteddu.

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2022-2023. LR 22/2018, art. 22

Image
ras