Eolicu. Madau (Irs): "Fai participai puru a is sadrus in is decisionis"

(IlMinuto) – Casteddu, 18 de su mes''e maju - "Puru fadendi s'ipótesi ca s'inchiesta chi bidit protagonista Ugo Cappellacci finat cun is assoluzionis, abarrat su fattu ca custa Giunta at agiudau su business de s'eolicu in favori de is sociedadis controlladas de capitali de apróliu dúbbiu. Sociedadis, custas, interessadas a speculai asuba de is risorsas nostras". Aici su candidau de s'Irs a sa presidénzia de provìnzia de Aristanis, Sebastian Madau, cummentat sa presénzia de su presidenti de sa Giunta regionali de Sardigna comenti protagonista in d'un'inchiesta de sa Procura de Roma po is apaltus de s'energia eolica.
"Su puntu - precisat Madau - no est nai no a s'eolicu, ma est a dd'afrontai in modu craru e a fai in modu ca is sadrus siant protagonistas in su processu decisionali e in cussu imprenditoriali. Ita sinnificau tenit fai ponni centinas de turris chi strupiant su logu po no guadangiai nemmancu su valori chi in su benidori at a serbiri a is buníficas de is areas interessadas?".