Elezionis provincialis : bincit su pópulu de chini no at votau. Casteddu, Nùgoro e s'Ogiastra ant a andai a su segundhu turnu

(IlMinuto) - Casteddu, 1 de su mes''e làmpadas - Casi unu sadru dógnia duus no at votau. Est custu su númeru prus importanti de is elezionis provincialis de su 30 e de su 31 de su mes''e maju. Su 43,25 po centu de chini no at votau ammostat difatis sèmpiri de prus s'istesiada de is eletoris de sa classi política de centrudestra e de centrusinistra.
Una mancànzia de fidúcia chi est diventada prus forti a pustis de is polémicas de is úrtimas cidas po sa chistioni de s'eolicu e a pustis de su scontróriu Travaglio-Milia.
Su centrusinistra concuistat a su primu turnu is provìnzias de Tàtari (chi cunfirmat Alessandra Giudici cun su 50,7 po centu), de Crabònia e Igresias (at bintu Tore Cherchi cun su 50,35 po centu) e de su Campidanu de Mesu (incàrrigu nou po Fulvio Tocco, elígiu cun su 55,13 po centu de is votus). Su centrudestra bincit imbecis in su primu turnu in is provìnzias de Aristanis (59,74 po centu po Massimiliano De Seneen) e de Terranòa-Tèmpiu (aundi at bintu Fedele Sanciu cun su 53,16 po centu de is votus).
Ant a depi imbecis torrai a votai po su segundhu turnu is eletoris de is provìnzias de Casteddu, de s'Ogiastra e de Nùgoro. In Nùgoro Roberto Deriu (32,47 po centu) sperat de otèniri s'agiudu de su democraticu "dissidenti" Efisio Arbau po cumbàtiri Luigi Crisponi (38,7 po centu) in su segundhu turnu. In Ogiastra, unu tempus unu casteddu "arrúbiu", est meda pagu certu s'arrisurtau de su segundhu turnu de is elezionis tra su candidau de centrodestra, Sandro Rubiu (43,8 po centu) e su democraticu Bruno Pilia (41,1 po centu).
In Casteddu imbecis su candidau de su centrudestra Giuseppe Farris (46,52) est in antavàgiu mannu si cunfrontau cun su presidenti de sa legisladura passada Graziano Milia (33,78 po centu). Ma s'arrisurtau de su segundhu turnu parrit no siat ancora certu si castiaus a su rolu chi in su primu turnu ant tentu is candidaus "screnciosus" Piergiorgio Massidda (9,03 po centu de votus de sa destra) e Federico Palomba (6,63 po s'Idv).