Elezionis in Tatàri. Sabino (aMpI): "931 sadrus líbberus ant tentu su coràgiu de votai a unu presoneri políticu"

(IlMinuto) – Casteddu, 2 de su mes''e làmpadas - "Scéti in sa citadi de Tàtari ddoi funt 931 sadrus líbberus chi ant tentu su coràgiu e sa forza de votai a unu presoneri políticu de s'indipendentismu acozau de una lista de truncadura totali cun s'istadu italianu e cun is rapresentantis suus in Sardigna". Aici s'imbasciadori nazionali Cristiano Sabino cummentat s'arrisurtau de A Manca pro s'Indipendentzia in is elezionis comunalis de Tàtari: 1,3 po centu a su candidau a síndhigu Bruno Bellomonte e 0,9 a sa lista de sa scuadra indipendentista e de sinistra. "In Tàtari - narat Sabino - sa grandu parti de is votus furiant giai donaus, lotizaus de is famosas clientelas disonestas de is comitaus de afari italianistas (alias partidus italianus). Votus incanalaus de traballantis ricataus de meris e de merixeddus, votus a is pardinus, a sa massoneria, a is rezas de sa Curia, votus manigiaus de is lobby de poderi chi de sémpiri guvernant Tàtari e espressant sa classi política sua".
"A su contrariu - concluit - is 931 votus a Bruno Bellomonte e is 612 a sa lista nostra funt votus líbberus, de genti chi at fattu unu sceberu de truncadura craru e forti, votus chi funt a foras de su surcu de una campagna eletorali chi at tentu tonus bascius, votus chi s'agatant a foras puru de is chistionis de pagu contu. Est a nai ca no si tratat scéti de votus, ma de bussinadas a sa ditadura de isfrutamntu aggraviosu impostu de su stadu italianu a sa nazioni nostra, una bera furriada a s'acanarjada política fatta in is cunfrontus de Bruno Bellomonte e de s'organizazioni nostra".