Provinzialis in Nùgoro: Sel e Idv cun Deriu. Arbau: "No seu in bendida"

(IlMinuto) – Casteddu, 7 de su mes''e làmpadas - A pagu diris de su ballotàgiu est ancora meda dubbiosu s'arrasutau de is elezionis provinzialis de Nùgoro. Su candidau Roberto Deriu at incassau s'acozu de Sel e de s'"Italia dei Valori" (listas "dissidentis" chi immoi ant sceberau de curri cun su centrusinistra uficiali), ma no cussu de is Rossomori e de su ribbelli Efisio Arbau.
Is sardistas de sinistra ant aclarau su pensu insoru in sa diri de ariseu cun d'unu comunicau de imprenta meda forti.
"Is Rossomori - est nau in d'una nota - no faint parti de custa alleànzia de centrusinistra. Su sceberu d'esclúdiri de s''amiganzia' is Rossomori proponendi a su postu de sa legítima rapresentànzia política in su Consillu Provinziali incàrrigus de Giunta est immorali. E forsis su centrusinistra ùltima versioni at a perdi".
Puru Arbau s'est stresiau de is métodus de su centrusinistra de Deriu. "Eus dimandau - at precisau Arbau - un'acórdiu a sa luxi de su sobi, un'acórdiu scritu in is ischedas eletoralis, comenti previdit sa lei, e in veci s'est proposta sa mantessi campagna de còmpora chi no mi podit biri pardinu".
"M'auguru - at concludiu su leader de 's'àteru centrusinistra' nugoresu - ca is eletoris no fazant pagai a su centrusinistra is erroris de una classi dirigenti serrada in is palazus de su poderi chi pensat de comporai totu e totus: Efisio Arbau e i democraticus no funt in bendida".