Noe ristorantes sardos otenent su marcu “Due Forchette di Gambero Rosso”

In sa Mesa - In Sardigna creschet su nùmeru de sos ristorantes chi ant otentu su reconnoschimentu de calidade. A lu sutalineare, pro mèdiu de sa “Guida Ristoranti d'Italia 2022”, est su “Gambero Rosso”.

In die de oe s'ìsula sighit s'andamentu italianu e registrat datos importantes. A lu dimustrare est difatis su marcu “Due Forchette di Gambero Rosso”, chi est istadu atribuidu a noe ristorantes sardos. Pro cumprèndere mègius custu datu tocat a pretzisare ca in su 2021 in Sardigna custu reconnoschimentu est andadu a chimbe ristorantes. Duncas, su nùmeru de sas atividades cun reconnoschimentu de calidade est adopiadu.

Su chi est istadu premiadu – si podet lèghere in su giassu internet de “Gambero Rosso” etotu - est sa realizatzione de unu produtu chi est friscu e peri originale. Sunt custas sas conchistas chi ant premiadu su chef Roberto Serra, chi cun su ristorante “Armidda” de Abbasanta at otentu sos “Tre Gamberi”. Gosi, Armidda si registrat tra sas atividades mègius in Itàlia. Unu resurtu, su de Serra, chi est istadu segudadu a pustis de bator meses dae su cumentzu de s'atividade sua. Serra etotu at sutalineadu ca sa fortza de “Armidda” sunt sos produtos impreados. Sunt produtos chi ant unu ligàmene forte cun su territòriu, produtos a km 0 e de calidade.

Ma torramus in dae segus, torramus a sos noe ristorantes chi ant otentu su marcu “Due Forchette di Gambero Rosso”. Sa primu cosa de pretzisare est ca sos chimbe ristorantes chi aiant otentu su reconnoschimentu in su 2021 l'ant otentu ocannu puru. Sunt su ristorante “Fuoco Sacro” de su resort “Petra Segreta”, su ristorante “Dal Corsaro”, su ristorante de Pomata in Casteddu, “Da Nicolò” in Carluforti e “Hub” in Macumère. A custos si devent annànghere sas “new entry” de su 2022. Sunt: “Somu” de “Baja Sardinia”, su “I Sarti del Gusto” e “Is Feminas” de Casteddu, “Musciora” de S'Alighera.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22