Terra semper prus caente conca a sa Cop28

Su 30 de custu mese comintzat in Dubai sa Cop28, sa cunferèntzia mundiale de su clima. In su mentre sa terra nch’at coladu pagas dies a como, su 17, su livellu crìticu de iscaldimentu globale. Cunforma a sos datos de Era5 amus coladu sos 2 grados tzentìgrados cunforma a sos livellos mèdios pre-industriales. In pràtica su 17 de santandria sa temperatura globale de s’ària fiat de 2.07° in prus de sa mesana mesurada intre su 1850 e su 1900, est a nàrrere in antis de s’impreu massissu de sos combustìbiles fòssiles. De prus, de custu totale 1,17 sunt sos grados in prus de sa mesana de su perìodu 1991-2020.

Custos datos cherent verificados in antis de sa publicatzione de sos datos finales ma sa tendèntzia est crara e in lìnia cun sas mesuratziones fatas ocannu. Nche semus prus addae de sos lìmites fissados in sas cunferèntzias in antis (1,5 fiat s’obietivu) e b’at timòria chi no aumentent sas temperaduras ebbia cantu sa velotzidade de custu aumentu. Ma pro como, cun sas abbas imbenientes, ant a aumentare sos meme cun sos putzetos prenos de fògia che chi de iscaldimentu non bi nd’apat. immàgine C3S/ECMWF

m.p,