"Sindrome de Quirra": duus mesis tra fatus e fueddus

8 Marzo 2011
Image
logoregione-SARDUesploso5-300x112.png

Ascurta custa nova



(Chistionis e Opinionis) - Casteddu, 8 de su mes''e martzu - Su 65 po centu de is allevadoris tra cussus chi traballànt ingíriu de 2,7 chilómitrus de su Poligonu de Capo San Lorenzo s'est pigau malis grais. Su 5 de su mes''e gennàrgiu de ocannu sa connoscéntzia de custus datus, arregortus de is veterinàrius de is Asl de Casteddu e de Lanusè, Giorgio Melis e Sandro Lorrai, torrat a oberri s'acuntéssia "Sindrome de Quirra". A pustis de duus mesis, su 4 de su mes''e martzu, su Cumandu de sa basi donat s'órdini de sbaratzu a is pastoris chi portànt su bestiàmini a pasci in is 13milla ètarus ocupaus de su Poligonu: est necessàriu bonificai a is areas. Sessanta diris, chi bint s'acuntéssia de Quirra in su coru de is crònacas, un'acuntéssia chi pigat puru s'atentzioni de sa Magistradura. S'11 de su mes''e gennàrgiu s'assessori de sa Sanidadi de sa Regioni Sardigna, Antonello Liori, in d-una nota de imprenta, cummentat aici a s'atividadi de sa Cummissioni ténnica chi spricuat asuba de Quirra: "Seu cumbintu - narat Liori - chi custa atividadi siat fundamentali po connosci sa beridadi asuba de su númeru mannu de is tumoris chi ddoi funt in cussu territóriu. Funt datus chi faint pensai, e deu apa a tenni in contu mannu is spricullitus chi ant essi fattus". Is fueddus de Liori spingint a Domenico Fiordalisi, de sa Procura de Lanusè, a oberri unu spricullitu asuba de is atividadis de su Poligonu prus mannu de Europa. Is cumpudadas de s'area ant agiudau a agatai unu muntonarxu de arrefudus militaris, arruncus de míssilis interraus e a arrestus de gherra in mari. Funt stetias fattas oberri puru is ennas de unu magasinu chi de 11 annus allogat 15 càscias cun materiali radioativu, càscias chi immoi funt a s'esamu de is espertus in is laboratorius de s'Universidadi de Casteddu. Cussu asuba de is 10 allevadoris malàdius de tumori e de is animabis strupiaus po mori de ai pasciu in su tretu de 2,7 chilómitrus de su Poligonu abarrat in dógnia modu unu datu cuncretu, puru si, po su Cordinadori de sa Cummissioni ténnica de espertus de sa cosa, est a nai de s'acuntéssia de Quirra, custus fatus "no parrint idóneus po s'isvilupu de unu spricullitu epidemiologicu".
Su Cumitau "Gettiamo le basi", is movimentus indipendentistas e una parti de sa sinistra de annus meda sighint a bolli sa serradura de unu Poligonu chi aghillit a esercitatzionis amantadas de su segretu militari e de cussu industriali. De pagu diris, Legambiente e sa Cgil puru funt pedendi de frimmai a s'atividadi de sa basi interforze. No si podint prus abetai - narant Legambiente e sa Cgil - "is arresurtaus de istudius longus e imbusticaus". Sa Cisl, invecis, parrit s'única boxi a foras de is abbóxinus e narat ca "Un'atentzioni giusta a sa saludi no si depit trasformai in allarmismu, poita is dannus fattus funt giai medas".
Ita ndi pensais bosàterus?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

© RIPRODUZIONE RISERVATA
Tags

Chistionis e opinionis

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

Commenti

a nosu Sardus anti portau sceti morti, mancai sighint a nai ca nci bolint ateras indaginis. fortzis no ant ancora cumprendiu ca sa vida si potet difendi sceti serrendi custus poligonus chi serbint sceti po arrichiri su stadu italianu chi depit po fortza bendi is armis chi fabricat. 5 parlamentaris Sardus de su PD in su 2008 anti votau eja po allarghiai su Poligonu de Quirra deu no mi ndi seu scarescia . Bastat aici !!!!

Tenit arraxioni Aurora, deu puru pentzu diaci e non mi ndi seu scarescia de su mali mannu chi ant fattus cusssus parlamentaris de su Pd a su populu sardu in su 2008.

Est de 150 annus chi funti boccendi, e inguni funt donendi morti de sa fini de is annus '50. Funti talmenti medas is dannus chi si si funti fendi ca no banstant is fueddus...E de custa genti maba fueddus e basta teneusu, depeusu fai pressioni po bunificai cussa terra e non sceti cussa

Deu da pensu cumment'e Mariella Cao de su Comitato Gettiamo le basi. A pustis de 55 annus de occupatzioni militari su "Poligono Interforze" de Quirra olliri serrau, poitta is pastoris (e no scetti issus) funti morendi e in sa basi preparant is guerras de su tempu benidori, cumenti narat Eugenio Campus.

Candu si trattara de perdi tempusu, ci funti meras modusu, in custu casu funti agattendi den tottu, ma nisciunu, si preoccupara de serrai sa basi po permitti indaginisi seriasa uno borta po sempri

Deu appu sempri pensau chi is militaris(is cumandantis, no is sordaus) funti sa peus categoria chi si possara incuntrai. Su chi esti suzzerendi in sa basi de Perdasdefogu du dimostrara.
Ant agatau unu muntonarxu de arrefudus militaris, arruncus de míssilis interraus e a arrestus de gherra in mari, magasinus chi de 11 annus allogat càscias cun materiali radioativu, càscias chi immoi funt a s’esamu de is espertus in is laboratorius de s’Universidadi de Casteddue Calincune deppiri andai in presoni po tottu custu. Non si poriri bocciri sa genti senz'è pagai.

Sa chistioni de Quirra è tostara, è tostara poitta oberriri medas atteras chistionis. Soberania, gherra, mallarias, alligamini, e chi pru ndi teiri pru ndi poiri.
Pò seghai in curzu strigiula bonifica e A FORAS!!

seu andara po meda annoso in Quirra poitta fiada unu bellu logu, ma dandi arrovinau e mi dispaxidi meda. me praxiu meda su libru de massimo carlotto "perdas", chi cristionada propriu de cussu chi esti suzzediu in custa parti de sa nostra terra: esti unu romanzu, ma si agattada puru meda veritadi!!