Sa Sardigna est ratzista?

(Chistioni e Opinionis) - Casteddu, 16 de su mes''e arbili - S'arribbu de 700 tunisinus in s'ex depósitu de s'arburada Su Masu, in Casteddu, at ammostau una Sardigna chi tenit duas facis: sa terra de acasàgiu e s'Ísula contr'a s'arribbu de is furesteris tunisinus. In Facebook sighit a abarrai online sa pàgini pubblicada de su Círculu "Giovane Italia Caravella" de Casteddu e lamada "Tunisino a domu sua (Rimpatriate i tunisini arrivati a Cagliari)": una pàgini ratzista est a nai pagu, chi "praxit" a centinas de personis. In su mamentu chi seus scriendi si podint ancora ligi is cummentus de chini cumbidat a "aprontai scuadras mannas de sa morti", a "nci bogai a custa genti" e "a no a ddus agiudai prus". Santidus de malacriméntzia trubaus puru de s'imprenta chi tzerriat a un'"apretu de violéntzia" chi no esist. Su presidenti de sa Regioni, Ugu Cappellacci, de una parti ringratziat a totus cussus chi ant scipiu donai "boxi bera a is valoris de sa solidariedadi sociali", ma de s'àtera narat de nou s'acàsigiu àteras personis chi si funt fuendi de su fàmini poita "sa Sardigna at giai donau su cuntribbutu suu a s'apretu furesteris". Is úrtimas cidas ant perou fattu bessiri a pillu un'Ísula chi bit s'acasàgiu comenti unu doveri. Sa Sardigna de is volonteris, de is sindacaus, de is assótzius e de is partidus chi ant obertu is sedis insoru po arregolli bistiris, crapitas, spruma de braba e saboni. Una fita de genti chi benit rapresentada beni de is fueddus de obertura de su comunicau de s'Usb Sardigna. "Cantu strossas ancora - si ligit in sa nota de imprenta de su sindacau de basi - cantu ndi depint ancora morri primu chi a disterraus, persighius, furesteris, fuius de is gherras, de is persighiduras,de su fàmini e de sa poberesa bengat donau s'únicu amparu umanitàriu beru, est a nai cussu de si movi in libertadi, unu diritu inalienàbili de dógnia essiri umanu?".
E bosàterus ita ndi pensais?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda