In Sardigna arribat Tui Travel sa compagnia aérea giai connota de is Sardus

7 Marzo 2012
Image
logoregione-SARDUesploso2030.png

Ascurta custa nova



(S’úrtima nova) – Casteddu, 7 de su mesi de martzu – In Sardigna, mentras s'aparaguladura de is nais andat asiadamenti, parrit cunfirmada puru po su 2012 sa punna a si movi cun is aéreus, mancai si su primu bancu de proa at essi su de su períudu de Pascamanna. Perintantu s'aereoportu de S'Alighera fait registrai un'acórdiu nou cun sa Tui Travel, culossu mondiali de is férias chi, comenti arrallatau in su giassu italianu de sa compagnia aérea, registrat dógnia annu 20 milionis de biaxadoris, 70 puntus de arribu po is férias, 3.200 agentzias de viàgiu, prus de 100 tour operator e 120 ariopranus de propriedadi. De s'acórdiu intre sa Tui Travel e sa Sogeaal, Sotziedadi de Gestioni de s'aereoportu aligheresu nàscia in su 1994 po boluntadi de sa Provìntzia de Tàtari, s'ant a tenni 3 cullegamentus charter cun sa tzitadi sardu-catalana. Ativus intre de su mesi de martzu e de su mesi de ledàminis, is bolus ant a cullegai S'Alighera cun Billund (20 de su mesi de làmpadas, 8 de su mesi de austu), Goteborg (6 de su mesi de làmpadas, 8 de su mesi de austu) e Colonia (31 de su mesi de martzu, 27 de su mesi de ledàminis) e ant a permiti de radopiai su númeru de is passigeris chi lompint de s'Europa de Tramuntana. Tocat a nai puru, ca su de Tui Travel no est unu nòmini disconnotu a is sardus, poita fut própriu custu colossu de is viàgius a spaciai, tempus fait, una fotografia de Cala Goloritzé comenti màgini de is costeras grecas. Unu sbeliamentu? Custu no ddu podeus sciri. E bosàterus ita ndi pentzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda


© RIPRODUZIONE RISERVATA

S'ùrtima nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda.

Image
Regione Autonoma Sardigna

Commenti

tocai picciocus fadei una bella nova de custu
http://www.unionesarda.it/Articoli/Articolo/256790. D sa Tui Travel no nau nudda ca est mellus