Bartzellona, su logu chi praghet a is giòvanos

(IlMinuto) – Casteddu, su 26 de abrile – Bartzellona, capitale de sa Catalugna e bantu de is catalanos, est che a unu museu architetònicu mannu e bivu, tra s'antigu e su modernu. Bartzellona, cun s'architetura sua, is butegas de design, is locales a sa moda e sa bida culturale ispipilla, la cunsìderant una de is tzitades prus bellas de Europa e est unu logu chi càstiat a su tempus benidore. Su prus de is giassos de interessu de sa metròpoli catalana sunt in sa tzitade betza, mentres chi sa tzitade moderna, chi est crèschida in s' 800, at unidu is biddas chi inghiriaiant su tzentru istòricu.

Dae Pratza de Catalugna, in pagu prus de 20 minutos, si podet lòmpere a pee a totu is logos chi bolimus bìdere: sa Catedrale, su Museu Picasso, is mercados, is palatzos progetados dae Gaudì, is museos istòricos e de Arte. Una rete metropolitana arribat lestra dae su tzentru a sa periferia.

Unu de is logos chi praghent de prus a is giòvanos sunt is Ramblas (in catalanu Les Rambles) chi partzint in duas perras sa tzitade betza. Totu a fùrriu atzapais su Barri Gotic, su bighinadu de Sant Pere cun is butegas e is locales a sa moda, La Ribera cun su Museu Picasso, su bighinadu de El Raval in ue est sa Domo de s'Arte Contemporànea, e su Portu Betzu.

Bos cussigiamus de girare a pee totu custa zona: partende de pratza de Catalugna fintzas a su mare sighide is Ramblas e dae inoghe intrade a su Barri Gotic. Duos logos in ue andare a mandigare e bufare sunt su Café de La Opera (Rambla 74), in cara de su Teatre del Liceu, e su Els Quatre Gats (carrer Montsiò 3), in sa tzitade betza, a sud de Pratza de Catalugna.

Bartzelona però no est isceti custu. De non pèrdere, difatis, s'itineràriu de is prendas de Gaudì. Unu mangianu intreu at a èssere netzessàriu pro visitare sa Sagrada Familia, sìmbulu de sa tzitade catalana. Sa lìnia II e sa lìnea V de sa metropolitana lompent deretu inoghe.

Su consìgiu nostru est de andare a merie a bidere su Parcu Guell, un'àtera òpera manna de Gaudì in ue s'arribat cun sa lìnia III. Su parcu est un'ispantu a beru! Ma no amus acabadu. Difatis cun sa lìnea III de sa metropolitana si lompet fintzas a sa Casa Batlò (Passeig de Gràcia 43), un'edifìtziu disinnadu de s'architetu.

S'urtima òpera chi bos cussigiamus de visitare est Sa Pedrera (Provenca, 261-265), in ue s'arribat cun sa lìnia III e cun sa lìnia V.

Fintzas is trasportos pùblicos funtzionant bene meda e bos permitint de fàghere unu giru in foras de sa tzitade.

Sa bida noturna de Bartzellona est in armonia cun custa tzitade: a sa moda, colorada e a bortas ispantosa. Pro custu Bartzellona est unu logu chi praghet meda-meda a is giòvanos.

Is locales tìpicos de Bartzellona sunt is Bar de tapas, is prus famosos sunt Xampaniet (carrer Montcada n. 22) e is duos tzilleris bascos (Euskal Etxea) semper in carrer Montcada.

Sa coghina catalana est una coghina de "mar y montaña". De tastare: s'Amanida Catalana, sa Zarzuela, s'Arroz a banda, sa Graellada de marisc, sa Llagosta i pollastre, sa Paella e is Patatas bravas. E de bufare? Bos cussigiamus is binos Penedès, Priorat e Alella. Bonos is durches puru: su Coca de Sant Joan, is bombons de músicil Flaona e is xuixo.

Carta de identidade de su logu