Unu biàgiu originale cun is campos de agiudu internatzionale

(IlMinuto) - 10 de abrile - Immoe chi est arribadu su beranu est torrende a si pònnere in motu sa màchina de is campos internatzionales de traballu voluntàriu, una manera originale de cumentzare unu biàgiu.
Is campos de traballu voluntàriu internatzionale, in Europa e in totu su mundu, sunt un'esperièntzia forte de "cundivisione": una manera pro intrare de a beru in una cultura e in una sotziedade diversa dae sa nostra, cumpartzende sa die e su tempus nostru, de traballu e de recreu, cun giòvanos e persones bènnidas dae totu su mundu, faghende unu traballu chi at una utilidade sotziale e agiudende sa comunidade chi at acollidu a is voluntàrios.

In custos biàgios non si faghent cursos de limba. Su chi is giòvanos ant a atzapare est unu raportu beru cun sa comunidade de su logu, chene s'intermediatzione de is sovrastruturas turìsticas.

Ma pro ite bos bolimus cussigiare custu tipu de vacàntzia? Isceti pro donare a su giòvanu biagiadore (chi depet tènnere nessi 16 annos), sa possibilidade de ismanniare is orizontes culturales suos.

Is campos de traballu (work camps) sunt esperièntzias de voluntariadu chi durant pagu tempus - organizadas dae paritzos assòtzios chi donant sa possibilidade de bìvere pro unu tempus chi in gènere est de 2/3 chidas in un'ambiente multiculturale, impignende•si in atividades de utilidade sotziale cuncreta, imparende su balore de su cunfrontu e de su istare paris.

A su voluntàriu in gènere lis pedint de si pagare su biàgiu e in prus una cuota minore pro s'iscrìere; pro su restu bi pensat belle semper sa comunidade de su logu. Duncas pro fàghere custa esperièntzia non bi cheret dinare meda - mescamente si abbarramus in Europa - ma "isceti" una boluntade forte, sa bògia de si pònnere in giogu, de connòschere realidades diversas e de proare sa capatzidade de si adatare a is bisòngios.

Is campos de agiudu internatzionale non lassant tempus pro su pasu e s'ispàssiu, ma sunt unu modu diversu pro crèschere paris cun àteros giòvanos.

Unu consìgiu? Su campu de agiudu "Una ciudad para todos" a Avellaneda, in Argentina.

Is atividades chi podent faghere is pitzocos sunt diversas: agiudare is maistros isportivos in su Club Mitre, o organizare is atividades de literadura, mùsica, isport pro sa "Casa de los Niños", in ue is giòvanos volontàrios podent agiudare puru a ammaniare is cosas de mandigare pro s'ismùrgiu, su pràngiu e sa chena. Is pitzocos podent colare meda tempus in Buenos Aires cun is pitzocheddos de sa "Casa de los Niños".

Is itineràrios de faghere in sa tzidade de s'Argentina sunt detzisos de s'istrutura chi acollit a is voluntàrios.

Un'esperièntzia chi bolet bìvida, duncas, ca comente naraiat s'iscritora Alexandra David- Néel "Chie biàgiat chene agatare s'àteru, no est biagende, s'est movende ebbia".

Is chi sunt interessados a custu tipu de biàgiu podent iscrìere un’e-mail a s’indiritzu info@vfp.org o tzerriare a su nùmeru de telèfono: 802-540-3060.

Carta de identidade de su logu