Campos de traballu voluntàriu custu istiu in Estònia e Lituània

17 Maggio 2014
estonia

 


(IlMinuto) – Casteddu, su 17 de maju – S’assòtziu Lunària, tra sas atividades suas, organizat su voluntariadu internatzionale, paris cun unu network de organizatziones de totu su mundu chi permitint de partetzipare a 35 progetos de traballu voluntàriu in Itàlia e belle 2.000 in àteros 65 istados.

Su traballu voluntàriu internatzionale, non b’at bisòngiu de lu nàrrere, est un’esperièntzia galana chi cheret proada. Intre totu sos logos chi podeis seberare bos cussigiamus meda sa Repùblica de Estònia e sa Repùblica de Lituània.

Totu sos voluntàrios chi cherent proare sa bida de una sienda agrìcola traditzionale in Estònia ant a abarrare cuntentos de su campu de voluntariadu istadiale èstone, chi est dae su 17 de su mese de argiolas a su 3 de su mese de ladàmine e est dedicadu a tentare sas gamas de berbeghes, a las tùndere, a traballare sa lana e a fàghere sos giardinos.

Arribados in s'aeroportu de Tallin, 4 km dae su tzentru de sa capitale èstone pagu prus o mancu, bos cussigiamus de leare su postale 2 pro lòmpere in su tzentru de sa tzitade. In antis de partire pro cumentzare su campu de traballu voluntàriu in sa sienda agrìcola traditzionale indicada dae Lunaria, bos cumbidamus a fàghere una visita lestra a Tallin.Sos logos cussigiados? Sa primu cosa de visitare est sa tzitade betza, est a nàrrere su tzentru istòricu.

Sa tzitade betza est partzida in duas alas: s'ala arta e s'ala bàscia, collegadas de sas carreras jalg Pikk e jalg Lühike. Caminende in sa carrera jalg Pikk si bident palatzos e portales decorados chi sunt un'ispantu pro sos ogros. A sa fine de jalg Pikk s'agatat Rataskaevu, un'istrada diaderu istraordinària. Dae inoghe, una caminada in carrera Viru, carreredda Müürivahe e carrera Vene bos at a permìtere de iscobèrrere diversas boutique e diversos ristorantes.

Su coro de sa tzitade betza est pratza Raekoja. Su nùmene benit dae su Palatzu Comunale, in istile gòticu, in ue s'agatat finas su sìmbolu de Tallinn, su campanile de Thomas. Dae custa pratza a sa crèsia de Sant’Olav sunt 7 minutos caminende trancuillos. In antis de lòmpere a sa crèsia de Sant’Olav si colat a dae in antis a s'ex cuartieri generale de su KGB. Torrende in dae segus, in carrera Vene, bos cussigiamus de visitare sa crèsia ortodossa de Santu Nicolau. Dae sa pratza de sa crèsia si andat a Toompea e a Lossi plats, sa pratza printzipale chi s'aberit a dae in antis a su Palatzu de su Parlamentu Èstone. De sos giardinos a inghìriu a su palatzu si podet ammirare sa prus manna de sas bator turres de su Casteddu de Toompea, sa Pikk Hermann. Dae inoghe, caminende a bia a nord, in sa Toom Kooli, si lompet a Kiriku Plats, in ue de una parte si podet visitare sa catedrale luterana e de s'àtera su museu de arte èstone.

Pro mandigare bos indicamus unu ristorante de coghina tìpica in tzentru, su Grandma's Place (Rataskaevu tn 10).

A pustis de custu tour turìsticu a Tallin bos podide partire pro s'esperièntzia in sa sienda agrìcola traditzionale!

Imbetzes in Lituània? In Lituània dae su 16 a su 27 de su mese làmpadas sos istimadores de sa mùsica podent agiudare a fàghere su de 14° Festival de sas traditziones bàlticas antigas, traballende pro chircare sos materiales e pro ammaniare sa logìstica e s’organizatzione.

Lòmpidos a s'aeroportu Internatzionale de Vilnius, pro arribare in tzitade sunt a disponimentu diversos mèdios de trasportu. A pustis, dae Vilnius tzitade pro lòmpere a Kernavė, bidditzolu de su festival, si depides mòvere cun sa corriera.

In sas dies de su campu de traballu chi depides fàghere bos cussigiamus de si gosare finas su logu.

Sa primu cosa de bìere a Kernavė est su giassu archeològicu, ca pro s'unitzidade sua est istadu collocadu tra sos benes de su patrimòniu mundiale de s'Unesco. De non pèrdere puru sa Riserva Culturale de s'Istadu de Kernavė e sa crèsia de su bidditzolu. Dae curtzu si podent visitare sos restos de sa crèsia betza.

Acanta de su terrinu de sa crèsia betza, in sa Riserva Istòrica e archeològica de Kernavė, s'agatant finas duas capellas. Àtera istrutura architetònica de bìere est s'iscola elementare, un'edifìtziu importante de su 1929.

In sas dies de traballu voluntàriu depides finas mandigare! E tando su consìgiu nostru est de assagiare a su mancu carchi pratu de sa coghina tìpica lètone: sos Cepelinai, sos Kibinai e su Kugelis.

Duncas, ite seis isetende? Non perdais tempus de badas: informade·bos telefonende a su nùmeru 06.8841880 o iscriende una e-mail a lunaria@lunaria.org.

Custa est un’esperièntzia de biàgiu chi cheret cussigiada, chi faghet crèschere sos giòvanos ispassiende·si e imparende sa responsabilidade e s’auto-gestione!

Carta de identidade de su logu

 

 

 

 

© RIPRODUZIONE RISERVATA