Est tempus de vacàntzias. Agabbados is esames bos cussigiamus Zante

(IlMinuto) - Casteddu, su 29 de maju - Est tempus de vacàntzias!
Ais agabbadu is esames? Tando preparade•bos pro sa vacàntzia prus ispassiosa chi ais mai fatu! Si bos bolides regalare unu biàgiu ispantosu su logu chi bos cussigiamus pro bos recreare a pustis de àere istudiadu che macos disiperados est s'ìsula de sa Grètzia Zante!

Su chi amus pensadu oe pro bois est unu biàgiu a prètziu baratu in fatu a s'aventura. Est sa de tres ìsulas prus mannas e prus a Sud de su mare Iòniu famada in totu su mundu pro sa Smugglers Cove, connota fintzas comente Navàgio, chi est una de is plajas prus connotas de sa Grètzia.

Zacinto est connota fintzas pro is plajas de Lagana e Geraka, cun arena bianca e abbas chi parent fatas de cristallu biaitu. Pròpiu inoghe istant is testòines de mare Caretta-Caretta.Est unu logu chi at a pràghere meda a is istimadores de sa natura. Ma Zacinto est meda de prus, ca in prus de sa bellesa naturalìstica bi sunt fintzas is paesàgios chi si podent castiare dae is montes e montrigos ammantados de pinos e grutas ispantosas. In Zante s'intendet un'atmosfera màgica de a beru! Cuss'ìsula costoit fintzas traditziones culturales ricas e sa gente de su logu est garbosa meda. Ma no est finida inoghe! Ddoe at atratziones meda, difatis, ais a agatare chentinas de discotecas e locales in sa ruga de su mare, pro fàghere ùnica ogni note e pro bos regalare un'ispàssiu mannu in is vacàntzias bostras!

Comente ogni itineràriu partimus dae sa capitale de s'ìsula, sa tzitade de Zante o "Zakynthos". Su mangianu: relax in sa plaja de Krioneri, a pagu distàntzia dae sa tzitade, a coa de àere superadu su portu andende a nord.
Su bortaedie si podet dedicare a bìere sa tzitade. Su tzentru est ispantosu, ricu de edifìtzios neoclàssicos.

Bos cussigiamus de fàghere una caminada in su casteddu Venetzianu, su monumentu beru de s'istòria de su logu. Unu pagu a suta dae su casteddu s'agatat su cùcuru de Strani, unu logu meravigiosu. In s'istrada chi portat dae Mpoxali a su tzentru de sa tzitade s'agatat puru sa cresiedda de Aghios Gheorghios ton Filikon. A su costàgiu si podet bìere su Campusantu Ebràicu. Passigiare in carrera Alexandrou Roma, s'istrada cummertziale e sotziale, est un'ispàssiu a beru pro ite inoghe est prenu de butegas de licores, profumos, prendas, ricamos, libros e meda àteru. Intre is logos de interessu de sa tzitade sunt de bìere:

- Sa pratza de Santu Marcu, tzentru istòricu e culturale de s'ìsula. Pratza cun pratza, un'istrada pedonale collegat pratza Santu Marcu cun pratza Solomou cun s'istàtua de su Poeta Natzionale. Inoghe agatamus puru su Museu de Zante, s'Archìviu Istòricu e su Museu de sa Rivolutzione Natzionale. A su costàgiu si podet bìere sa crèsia de Santu Nicolau tou Molou.

- Sa crèsia Catòlica de Santu Marcu. Sighende a caminare a palas de sa Seu si podet ammirare sa crèsia Naòs tis Kyrìas ton Agghelwn.

Pustis, pro bìere sa tzitade in totu sa meravìgia sua si podet artziare fintzas a Bochali.

In custas dies de vacàntzia a Zante bos cussigiamus de tastare sa melitzanosalata, sa taramosalata, su tzatziki, sa horiatiki, is souvlaki, su stifado, sa tyropita e su baklavas.

Prenotade is vacàntzias in s'ìsula de Zante e de seguru no ais a bòlere torrare prus a domo!

Carta de identidade de su logu