Una vacàntzia in Selva Gardena, una prenda in sas Dolomites.

13 Maggio 2014
selva gardena

(IlMinuto) – Casteddu, su 13 de maju – Est a un’artària de 1563 metros subra su livellu de su mare e est unu de sos logos alpinos prus connotos e prus istimados. Semus faeddende de Selva Gardena (Wolkenstein - Sëlva), una badde in mesu a sas Dolomites inghiriada dae sos montes Sella e Sassolungo.
Sos montes a inghìriu oferint unu paradisu a sos apassionados de isport ierriles e finas a sos apassionados de sos isport chi si faghent in s'istiu.
Deretu in tzitade tres impiantos de funivia modernos portant in su Sassolungo, in su Sella e in su Grupu de Puez.

Pro sos amantes de su sci e de su snowboard Wolkenstein - Sëlva est su logu giustu. Dae su tzentru de sa bidda si podent, difatis, segudare in pagos minutos sas pistas prus bellas de su carosellu isciisticu Dolomiti Superski o puru isciare in sa famosa Sedda Ronda.

Sa traditzione acasagiadora de Selva Gardena est petzi una de sas fortzas suas.

Seis prontos a bìvere dies e notes incantadas? Tando bos depides regalare una vacàntzia in Selva Gardena, una bidda minore e alligra in sa Badde Gardena de su Sud-Tirolo, pròpiu in mesu a sos montes de sa Sella Ronda.

Selva Gardena est unu de sos logos turìsticos prus famados de totu sas Alpes, fintzas pro su paesàgiu istraordinàriu de sas Dolomites, Patrimòniu Naturale de s’Umanidade pro s’UNESCO.

Sa bidda acollit sos biagiadores ammaghiende·los cun una cumbinatzione de isport e ispàssiu. Tra un’essida in mesu a sa natura e bator brincos in sa pista de ballu, in sa vacàntzia bostra de infadu non nd’ais a agatare in perunu logu. In custu cugione de paradisu si colat dae sos eventos isportivos a cussos traditzionales, dae sos giros in sa badde cun sas guidas a sos cuntzertos: custa badde de sas vacàntzias non dormit mai e b’at semper carchi cosa de fàghere a ogni ora e in ogni logu.

Giai cun una sèmplitze caminada in sa bidda s'aberit a s'istràngiu unu mondu totu nou. In prus de sas butegas de sos artesanos chi faghent traballos de intzisione, sos amantes de s'istòria ant a agatare sa crèsia "Maria Hilf", santuàriu chi ammentat a sa gente morta in sos montes, e sa cresiedda de Santu Silvestro, a s’ala Vallelunga. A curtzu si bident fintzas sas ruinas de su casteddu de Wolkenstein, in s’oru de sas rocas de su Monte Stevia.

De non pèrdere finas sas isculturas de nie e astra chi s'agatant in sa bidda.

E si bos bolides pasare in unu logu ispantosu inoghe agatades su locale giustu pro bois: su Cafè Mozart. Un'ambiente bellu e un'atmosfera callente. Inoghe s'agatat un'issèberu mannu de grapas e durches bonos meda. De assagiare su strudel e sos Krapfen.

E pro agabbare, sas bonas furchitas ant a atzapare in Selva Gardena paritzos ristorantes in ue coghinant màndigos bonos de coghina tìpica.

Pro pràndere o pro chenare depides andare, a su mancu una borta, de L Mulinè (istrada La Selva 100). Inoghe dae su tzentru de sa bidda si lompet in mesora de caminada sighende su percursu marcadu in su padente. De assagiare: sos canederli, su gulasch e su Kaiserschmarren, unu durche diaderu ispetziale.

In fines, non mancant mancu sos pub, sos locales “àpres-ski” e sos locales noturnos pro ballare!

Carta de identidade de su logu

Fotografia de Bill Anderson, pigada de Flick

© RIPRODUZIONE RISERVATA