A Manca pro s'Indipendentzia: difendimus sa limba nostra!

25 Ottobre 2014
Difendimus sa limba nostra!

Dae su 2007 a oe sa polìtica linguìstica in Sardigna aiat fatu passos a in antis, boghende sa limba nostra dae s'emarginatzione in ue l'aiant serrada 250 annos de proibitzione, e comintzende a li torrare sa dignidade chi li deghet, ca est sa limba istòrica de su pòpulu nostru e una limba chi est connota e faeddada dae una parte manna de sa populatzione.

In su 2007 ant aprovadu sa LSC, un'istandard de iscritura de su sardu chi est netzessàriu pro giùghere a in antis una polìtica linguìstica sèria, e chi s'organizatzione nostra reconnoschet e impreat in manera cumplementare cun totu sas variantes de sa limba sarda.

Su sardu est intradu in su mundu de sos mèdia, cun progetos editoriales de sas rivistas periòdicas, giornales online, ràdios e televisiones, giutos a in antis gràtzias a sos finantziamentos regionales: est una chistione de importu mannu pro sos mèdia minores, chi a bortas podent sighire a traballare petzi pro more de custos finantziamentos.

Gràtzias a sa lege 3 de su 2009 sunt comintzados sos cursos de sardu, finantziados dae sa Regione e aparitzados dae sas iscolas in oràriu curriculare: 22 iscolas ant organizadu sos cursos in s'annu iscolàsticu 2010/11, 30 in su 2011/12, 40 in su 2012/13, finas a arribbare a sos 180 cursos chi ant fatu s' annu passadu.

Su nùmeru de sos cursos est andadu creschende in pare cun s'entidade de su finantziamentu, chi s'annu passadu fiat de 450.000 èuros; e ogni annu b'at àpidu iscolas medas chi sunt abarradas chene finantziamentu ca su dinare fiat agabbadu (60 iscolas in s'annu passadu).

Oe b'at su perìgulu chi sa Giunta regionale nche iscontzent totu su chi de bonu aiant fatu, bidu chi sa Regione no at galu fatu essire su bandu pro finantziare sos cursos de sardu in sas iscolas e si non l'ant a fàghere essire luego, ocannu no ant a imparare su sardu in peruna iscola. Non s'ischit ite fine at a fàghere s'isperimentatzione de s'istandard, sos progetos in sos mèdia, sas tradutziones de òperas de sa literadura internatzionale e totu sas àteras fainas pro su bilinguismu.

Is periòdicos online e in pabiru sunt galu isetende chi lis paghent su traballu de s'annu passadu.

Su problema de custa Giunta no est chi non bi siat bona a guvernare e no est mancu su de su pagu dinari, bidu chi lu agatant pro finantziare cosas chi sunt prus pagu importantes: su problema est chi intre sas prioridades issoro non bi sunt sos interessos de su pòpulu sardu, ma interessos angenos.

Nois non cherimus permìtere chi nche imbolent totu su traballu bonu chi aiant fatu in sos ùrtimos annos, pro custu cherimus fraigare una mobilitatzione manna in pare cun totu sos chi traballant pro su bilinguismu e cun totu sos chi cherent difèndere sa limba sarda. Sa limba nostra est un'aina de isvilupu culturale e podet dare traballu a gente meda, investende in sa cussèntzia natzionale nostra.

Pro custa resone pedimus a totu sos giornalistas, a sos insegnantes, tradutores e operadores chi in custos annos ant traballadu pro sos progetos in limba sarda, a sos istudiantes sardos e a totu sas fortzas polìticas e sotziales chi gherrant pro unu bilinguismu cumpridu in Sardigna, de si pònnere in pare e de falare a pratza pro pedire su respetu de sos deretos linguìsticos de su pòpulu nostru.

A Manca pro s'Indipendentzia
© RIPRODUZIONE RISERVATA