Cun Alvure unu biàgiu ispantosu intre sos sabores de sas birras mastrinas de Su Masu

Unu birrifìtziu originale meda chi produit bevidas de si lìnghere sas lavras
29 Febbraio 2020
alvure_birrifìtziu

* Dae sa terra a sa butìllia *Alvure est unu birrifìtziu de Su Masu chi at unu nùmene importante. Sa terra de Sardigna, s’ischit, costoit paritzos àrbores chi sunt de sos prus bellos de Itàlia e calicunu intre custos at prus de milli annos.

Rapresentat su birrifìtziu Alvure unu ghinìberu chi est unu de sos àrbores meravigiosos de s'ìsula nostra. Pro sa pretzisione, custa realidade de su mundu de sa birra, est rapresentada dae su ghinìberu ruju, su matessi chi in latinu at su nùmene Juniperus oxycedrus: una mata nuscosa e forte, chi portat fragu de timàngia. In su tempus coladu, custa mata beniat impitada pro fraigare sas traes de sas domos. Oe, imbetzes, s'agatat a s' ispissu in sas coberturas de sos pinnetos.

Sos meres de Alvure, Albertu, Frantziscu e Màuru, ant batidu su ghinìberu ruju in intro de sa birra AltBier, una bevida chi at sos sabores de sa terra de Sardigna. AltBier est una birra a colore de pinnadellu de 4,9% grados, incubonada pro tempus meda e meda nuscosa, at unu sabore praghile de ghinìberu e si distinghet pro èssere una bevida frisca cun un'ispuma carca a tipu mantega. AltBier est una birra ùnica a beru.

arvure birrasIn prus de s'AltBier, su birrifìtziu de Su Masu produit àteras birras puru, chi sunt una prus bona de s'àtera: sa Blanche, sa Blonde Ale e sa Ipa.

Frisca meda e cun pagu alcol (4,3%), sa Blanche est una birra Alvure interessante meda. Pagu gasada e cun un'ispuma bianca, omogènea e durajola, est una birra chi bogat nuscos de limone, zènzeru e coriandru: totus ingredientes chi la faghent una bevida ingolumadora chi nde bogat su sidis. Est perfeta pro la bufare in sas dies de basca meda.

Sa Blonde Ale est una birra in colore de oro, cun 4,7 grados de alcol. Si caraterizat pro àere ispuma meda. S'ispuma sua est che una crema. Bonde Ale at unu sabore marigosu lene-lene e est bona pro la bufare in cale si siat momentu de sa die.

Pro chie preferit sa birra cumpata e carca, s'Alvure at produidu sa Ipa, una bevida de 6,2 grados de alcol. Ipa est una birra marigosa e saborida meda, chi at nuscos de lùpolu e unu pagu de agrumes.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aggiungi un commento