Sa Corona de Logu faghet chimbe pregontas a su guvernu de sa Regione Autònoma de Sardigna

17 Febbraio 2020
metanu

Publicaus su documentu integrali de sa Corona de Logu.


Sa Corona de Logu ponet chimbe pregontas de importu a su guvernu de sa Regione Autònoma de Sardigna. In antis de pigare positzione subra sa metanizatzione de s’ìsula, comente amministradores locales indipendentistas cherimus craresa subra s’argumentu. Sos tzitadinos de sas comunidades nostras cada die nos pregontant su chi amus antitzipadu in antis e pretendent de ischire sas rispostas. Sas rispostas, però, mescamente subra unu tema comente custu, las podimus dare petzi a pustis de un’istùdiu fungudu e de una valutatzione realìstica, non ideològica e non afarìstica, de sos bisòngios de sa Sardigna e de sos abitantes suos. Bisòngios de su presente e de su cras: non nos nche podimus ismentigare chi custa infrastrutura at a orientare pro deghinas de annos sas polìticas e s’esistèntzia de fìgios, de nebodes e de chie no est ancora nàschidu. Sas chimbe pregontas resument sos chimbe temas primàrgios chi pertocant sa metanizatzione de s’ìsula. Petzi una risposta crara e argumentada a totu sas pregontas nos at a permìtere, paris cun sas comunidades nostras, de pòdere seberare cun cabu. 

Sas chimbe pregontas:

1) Cale at a èssere su costu definitivu de su metanu pro sos sardos chi l’ant a impreare?

2) Su metanu comente at a arribbare a sas 300 Comunas chi no ant a èssere tocadas dae sa dorsale? Pro sos sardos a cumbenit a gastare 1,6 milliardos de èuros pro fàghere una dorsale chi nche crompet petzi a 73 Comunas?

3) Cando at a èssere pronta s’infrastrutura? In cale annu?

4) Su metanu at a fàghere a manera chi s’Ìsula siat autònoma?

5) B’at riscos ambientales? Cales?

© RIPRODUZIONE RISERVATA