Talavè: una cantina chi valorizat unu patrimòniu istremenadu

S'istòria de Vissente, Bobore e Fabritziu sos tres bingiateris de Triè impignados pro otènnere binos ùnicos e calidade manna
25 Febbraio 2020
cantina talavè

* Dae sa terra a sa butìllia * Un’istòria giòvana, sa de sa Cantina Talavè de Triè, una bidda chi s’agatat in sa provìntzia de Ogiastra. Semper e cando, inoghe s’istòria de sa bide e de su binu at raighinas antigas. Dae su tempus de sos nuraghes finas a oe sa bide in Triè nche l’ant semper coltivada. Difatis, su territòriu de sa bidda est prenu de singiales chi pertocant sa bide e su binu. Sunt medas sos repertos agatados durante sos iscavos de su nuraghe chi s’agatat a curtzu de sa Cantina Talavè. Àteras testimòmias sunt reperìbiles in unos cantos de documentos papales.

Sa Cantina Talavè naschet pròpiu pro valorizare custu patrimòniu illacanadu.

S’istòria de sos tempos colados, duncas, s’aunit a sa de como pro faeddare de bides autòctonas, comente su Cannonau a fògia cun tres bicos e s’Amantosu. Onni fundu benit allevadu sighende sos critèrios de coltivatzione traditzionale, a fundos minores. Posca de sa binnenna, sas àghinas si traballadas in cantina in manera màstrina e sighint compidende•las fatu fatu.

Sos tres meres de Talavè, Vissente, Bobore e Fabritziu, pro lòmpere a otènnere binos ùnicos e de calidade manna si sunt impignados a respetare sa particularidade de su sarmentu chi coltivant e de su terroir. Fraigada in su 1990, sa cantina Talavè est unu fràigu de propriedade de sa comuna de Triè, chi l’aiat progetadu comente logu pro chie andaiat a bìere giassos archeològicos e si podiat firmare in cue pro si pasare e pro manigare. In tames, in su 2012, in intro de su progetu “Bìngias antìgas” s’edifìtziu est istadu mudadu in cantina.

Sas bìngias de Talavè s’imbenint in sos sartos de Triè, chi sunt caraterizados dae terrinos diversos.

patrimòniu archeològicuSa bìngia Cercellò est allevada in unu terrinu fatu de lugiana e calcare meda. Inoghe ant prandadu sarmentos de Cannonau, Amantosu, Muristellu nieddu e Monica.

Cananeu, imbetzes, est una bìngia traballada in unu terrinu chi at una cumpositzione de arena e de isfaghidura de granitu. In Cananeu sunt coltivadas matas de Cannonau, Muristellu nieddu, Monica, Grannatza e Muscadeddu.

Sa bìngia de Truncant’alinos puru est coltivada in unu terrinu de arena e de isfaghidura de granitu, inoghe sa bide coltivada est feti su Cannonau.

Su primu binu produidu dae Talavè est unu ruju, s’Amanthosu, bonu meda pro lu bufare cun antipastos de terra e petza arrustu.

Fìgios de sa cantina ogiastrina sunt: un’àteru ruju, su Kirisi, unu DOC otentu feti cun àghina Cannonau, e unu biancu, s’Isposa, unu blend de Muscadeddu e Grannatza, perfetu pro acumpangiare durches traditzionales.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aggiungi un commento