'Nora: sas birras ulianesas de sa Giuighissa

*Dae sa terra a sa butìllia* - Sas 'Nora sunt birras màstrinas de calidade chi ant unu nùmene chi at fatu s'istòria. Unu nùmene importante, chi s'ispirat a sa Giuighissa e Soberana de Sardigna Lianora D'Arborea, sa Reina chi in su 1392 aiat promulgadu sa Carta de Logu, còdighe de leges de su Giuigadu de Arbaree.

Su birrifìtziu est fìgiu de s'interessu e de sa passione chi Giovanni Fele e Bastiano Secchi ant pro sa birra. Dae custu amore, in Ulìana est nàschidu su birrifìtziu 'Nora, una realidade produtiva chi at arrichidu unu panorama chi fiat giai carcu e losanu.

Sas bèvidas de sa Reina sunt birras lager cun pagu incubonadura e non pastorizadas. Onni eticheta 'Nora est su resurtadu de una circa fitiana, un'esperièntzia manna nàschida dae sa passione pro sa calidade de su produtu e pro s'amore de s'arte brassìcola.

In sas retzetas issoro, sos de 'Nora impreant feti maltos e lùpulos de primore, chi si mìsciant a manera perfeta a s'abba de sa miza de su Su Gologone. Un'abba oligominerale chi mizat in Ulìana dae tempus longu e chi dat a sas birras 'Nora sas caraterìsticas ùnicas chi las faghent connòschere comente bèvidas primorosas e nuscosas.

Ruja, Bionda, Nighedda, Antiga, Aleruja e Beccu sunt sas propostas interessantes de su birrifìtziu ulianesu. Bèvidas ispetziales chi praghent a totus, a un pùblicu mannu e vàriu, fatu de genti comune e de espertos.

Sa Ruja est una birra Vienna amber lager cun pagu incubonadura, chi at un'ispuma fini e durajola e chi si caraterizat pro àere nuscos e sabore de frùtora. Ruja est una bèvida echilibrada chi lassat in buca unu saboreddu marigosu praghile.

Ispirada a sas German lager, sa Bionda puru est una bèvida cun pagu incubonadura. Una birra ùnica chi, gràtzias a sas madrighes e a sos lùpulos impreados, at nuscos de frùtora e de frores. Bionda est una bèvida a sabore forte de maltu cun àrviu de lùpulu. Un'eticheta bilantziada bene intre unu sabore marigosu lèbiu e unu sabore unu pagu durche.

Buddida pagu, sa Nighedda est una Dark Lager Munich Dunkel, una birra iscura cun un'ispuma che panna, bella aderente e cumpata. Àrvios de cafè turradu chi amentant a manera lèbia su tziculate faghent de Nighedda una bèvida interessante, chi si caraterizat pro àere unu sabore bilantziadu a manera perfeta cun su durche de su maltu.

Antiga est imbetzes una bèvida buddida meda. Custa Italian Grape est una birra ruja chi at un'ispuma fine e durajola e nuscos de frùtora ruja cun un'àrviu lèbiu de àghina.

Antiga faghet parte de s'ùnicu istile birraiu italianu tzertificadu, s'Italian Grape Ale o IGA. Custa birra impreat comente ingrediente s'àghina e puru sos derivados suos comente sa saba, cun preferèntzia de cussa fata cun àghina Cannonau. Un'issèberu chi dat a Antiga unu caràtere territoriali marcadu.

Nuscos echilibrados intre maltos e lùpulos, un'ispuma fine e durajola e unu sabore de mele forte chi li donat s'abbamele annantu in fase de buddidura sunt sas caraterìsticas printzipales de Aleruja, una English Strong Ale cumplessa chi serrat cun unu sabore marigosu licantzu meda, chi lassat sa buca neta e pronta a una bucada noa.

Cun unu sabore crispu de maltu, Beccu est una birra beverina chi s'ispirat a s'istile bock lager. Pagu buddida e bene bilantziada, custa est una bèvida carca e bella cumpata, chi at àrvios de maltu, còrgiu de pane e mele caramelladu.

Totus sas etichetas 'Nora sunt birras màstrinas de tastare, produtos locales innovativos e traditzionales, iscusòrgios de iscobèrrere, richesa manna de unu territòriu famadu pro sos binos suos.